8 “Rava Numa Gara Vivivireina ina voai, da taui maiteni ana mae. 9 Numa gara ma orana purapurai ana viatataiem nanare ona voai.”

10 “Ma bokisi ai acaciei ina voai, ana manawa 110 cm, ma ana dabora 66 cm, ma ana ḡae 66 cm. 11 Ma gold aiainei ma viaitani au orana ma au doa, ma au tepana ana via goldei ma tere-kwaviviroi. 12 Ma ana loji 4 ma vokaukauei ma au aena 4 ma terei; ma au baba ḡelauna loji ruaḡa ina mae ma au baba ḡelauna loji ruaḡa ina mae. 13 Ma ai acaciei anipawe ma kauei, ma goldei ma viaitani. 14 Ma anipawe au loji bokisi au babana ma raviai, da ina pawei. 15 Anipawe au loji ina mae, eḡa ina taina-lavui. 16 Ma au tarawatu ḡaima dabadabai ruaḡa au tepai a girugirumia bokisi au orana ma terei.

17 —Ma uḡu*uḡu ḡoʼapoapoei e viviaitani , gold aiainei ma kauei, ana manawa 110 cm, ma ana dabora 66 cm. 18 Ma Cherub ruaḡa ma kauei gold gudagudanei ma uḡu au giana ruaḡa ma terei. 19 Ma Cherubim ḡelauna au gia ḡelauna ma Cherubim ḡelauna au gia ḡelauna ma kauei da uḡu maiteni ina vitagogi. 20 Ma Cherubim papei au aidamo ina viloloi, ma ina vinao vereverena, da ḡoʼapoapoe tauvaitawaneina uḡuna ina gagaloei. 21 Uḡu au tepana ma terei, ma ḡaima dabadabai ruaḡa bokisi au orana ma terei. 22 Ma uḡu au tepana, Cherubim ruaḡa au poui kampa tana vinenebelana da au tarawatu ana verem rava mai Israel aubaii.”