1 Ma Bada Moses i riwei, 2 “Au Numa Gara Vivivireina ma vimairini aupom tagogi, madeḡa au vouna. 3 Tarawatu 10, Parivainuaḡana bokisina au orana ma poai, ma au naona anitereḡaḡara ma teretaḡonei da numa garana ina babalaraḡi. 4 Teibol ma ruiei ma au tepana aiwai i kaukauei aubaina ma terei. Ma rampa anivojijinana ma ruiei, ma rampa ma terei 5 Ma incense aniapuna goldei ma terei bokisi au naona ma anitereḡaḡara ḡelauna ma terei da Bada ana numa gara vivivireina ina gudui. 6 Numa gara au metaetana, au doa, pulo aniapuna ma terei. 7 Anirauoḡa numa gara ma pulo aniapuna au poui ma terei ma waira ma vioai. 8 Numa gara ma pulo aniapuna anitereḡaḡara ma tere-kwaviviroi da dobuna ma gari. Ma au anirui anitereḡaḡara ma vidawei.

9 —Ma oil viaiainana ma vaia ma numa gara ma purapura anatapui au orana ma buloi ma ma vovivirei da vivivireina. 10 Ma pulo aniapuna ma ana purapura maiteni ma buloi ma ma vovivirei da vivivireina. 11 Anioḡa abomana ma ana animairi maiteni ma buloi ma ma vovivirei da vivivirei.

12 —Aaron natunatuna ma neiai numa gara vivivireina au metaetana ma wairei ma oḡai. 13 Ma Aaron pirisi ana gara vivivireina ma vioteni ma oilei ma vovivirei da aubaiu ina vipirisi pulo tauapuina. 14 Ma natunatuna ma neiai ma pirisi pulo tauapuina ai gara ma vioteni. 15 Ma ma buloi me amai u buloi nanare da ina vipirisi pulo tauapuina. Wei viaiainana Aaron ana epaepaia i vovivirei da mara nonoa kimtana patapatana awari ina vipirisi pulo tauapuina. 16 Moses anatapuna i kauana-paiei me Bada i ririwa nanare.

17 —Anina ma madeḡa au viruaina au pom tagogi nawaravi tagogi, taui numa gara vivivireina i vimairini. 18 Moses dogo i ḡarai ma tuatua i tonei ma terewaba ma anitapejijinana i ragini. 19 Ma gara ḡamoḡamo opinei i ḡauḡauri au tepana i ebani, Bada i ririwei nanare.”

20 Anina ma Moses ḡaima dabadabai ruaḡa bokisi au orana i terei. Ma anipawe loji au orana i vionaḡi bokisi au adana, ma uḡuna i viaitani. 21 Ma bokisi i ruiei God ana au numa gara vivivireina ma anitereḡaḡara i terei da bokisi i mae-ḡaḡari, Bada i ririwei nanare.

22 Ma nanare teibol i ruiei God ana au numa gara, anitereḡaḡara i mae ma au doei, au laubadei i terei 23 ma teibol au tepana palawa i pulopuloei Bada awarina i terei, Bada i ririwei nanare.

24 Rampa aniterenana i vaia ma au numa gara teibol au naona, au babaḡela au rauanaḡei i vikialai. 25 Ma rampa i apui Bada awarina, me i ririwei nanare.

26 Incense aniapuna goldei anitereḡaḡara au naona i terei numa gara vivivireina au orana. 27 Anina ma au tepana incense ḡabuḡabui i apui, Bada i ririwei nanare. 28 Ma anitereḡaḡara i terei da aninae au numa gara vivireina i gudui.

29 Pulo aniapuna Bada ana numa gara vivivireina au metaetana. Au tepana ḡamoḡamo ma palawa i apui me Bada i ririwei nanare.

30 Ma aboma ḡaeḡaena numa gara ma pulo aniapuna au poui i terei, ma au orana waira i waḡi anioḡa aubaina, 31 ma kampa Moses ma Aaron ma natunatuna urai ma aei i oḡai. 32 Taui aei ma urai e oḡaoḡai maranai e ruirui au numa gara bo e nenae pulo au aniapuna.

33 Ma Moses Numa gara ma Pulo aniapuna i gari-kwaviviroi. Ma anitereḡaḡara i terei au anirui. Anina ma Moses ana nola i kwa.

34 ✡1Ki 8:10-11; Isa 6:4Ma apau Bada ana Numa Gara Vivivireina i purui ma ana boruma numana i vioai. 35 Apau numa gara vivivireina au tepana i kiala ma Bada ana boruma numana i vioai ma lamna aubaina Moses eḡa tagotagogina da ita rui. 36 Ma apau i vovoepa lamna maranai mai Israel ina vaḡai au dobuḡela. 37 Ma mepa da apau eḡa ita voepa lana taui eḡa ina nae. 38 Maranai mai Israel e vaḡavaḡai, Bada ana animae apau au orana numa gara vivivireina au tepana ma waguvarai tauna ai apau au orana e ararata.