1 ✡Gen 1:28Ma God Noah natunatuna maiteni i viaiaini ma i riwei i pa, “Ona vinatuna ma ona vimaḡaimi da dobu ona vioai. 2 Ana kauei da ḡamoḡamo ḡaeḡaei ma ḡamoḡamo tetetei, iana ma kiu, anatapui ina rovoemi. Ma au urami ana terei da ona vibadei. 3 Aiwai anatapui lawalawai ami aniam. Modu anoi ma ai uana a veremi, wate marina aiwai anatapuna a vereveremi ami aniam.

4 ✡Lev 17:10-14—Wate vioa taratarana eḡa ona ani, aubaina tara au orana lawana e mamae, ona voterei da tarana ina toi tawanana ma muriai ona ani. 5 Ma mepa da ḡamoḡamo rava i viraḡeni. Tau ana raubiwa, wate nanare rava, rava turana i viraḡeni. Tau ana raubiwa.

8 Ma God Noah natunatuna maiteni i riwei i pa, 9 “Ona rautaniḡana wei marina, Tau au parivainuaḡana bagibagina taumi ami epaepaia maiteni a kaukauei. 10 Ma ḡamoḡamo lawalawaii anatapuna, kiu ma ḡamoḡamo numei ma moduei ma anatapui wagei i opuopu, ma ḡamoḡamo anatapui muriai au dobu ina mae. 11 Wei riwanei au parivainuaḡana bagibagina taumi maiteni a terei da eḡa melanai ututuva ḡelauna ana paritawanana-meleiai au dobu da purapura lawalawaii ina vipupui.”

12 Ma God i riwa, “Parivainuaḡana bagibagina a kaukauei taumi ma anatapui lawalawai maiteni anatapui muriai e nenei. Wei parivainuaḡana matairana wenanare: 13 Warilolo au apau ana terei da ina vimataira da tau au parivainuaḡana bagibagina a terei tau ma taumi ma anatapui lawalawai au dobu maemaei. 14 Maranai mara e ḡuvaḡuvai ma warilolo au apau e eḡaeḡa, 15 lamna ina vieḡeu da au parivainuaḡana bagibagina tau ma taumi ma anatapui lawalawai au dobu. Ma eḡa melanai ututuva lawana ina vipupui.”