1 Au naona rava anatapui au dobu pona tagogi ma riwa tagogina i bababaniei. 2 Nai maranai rava i vaḡavaḡai nae au maramatanei ma wapu au ḡaeḡaena i ḡeta au Shinar *Babilon au paratana. ma kampa i mae.

3 Ma i babani vivira i pa, “Ona nei, doa tana vaia ma brik tana pasi ma tana apui da ina bagibagi.” Ma nanare ai numa brikiei i voai ma koltei i ampasi. 4 Ma taui i riwa, “Ona nei melagai ḡaeḡaena tana voai tauta aubaita ma numa ḡeḡe dewadewana tana voai da ina ḡae au mara da wavata tana kauei ma eḡa tana vilamoneta dobu au anatapuna.”

5 Anina ma Bada i ḡairai da ravai melagai ḡaeḡaena ma numa ḡeḡe dewadewana i voavoaia ita inanai. 6 Ma Bada i riwa i pa, “Wei taui rava tagogi ma pona tagogina e bababaniei. Wei lamna karena, aburuna ava aiwai ai au nota anatapuna ina kauana-paiei. 7 Ona nei tana ḡaira da noi ravai ai pona tana vinua-raḡaraḡai ma ina babani labalababa.”

8-9 Anina ma Bada rava anatapui ai pona i vinua-raḡaraḡai ma i vilamonei dobu au anatapuna, lamna aubaina nai melagaina i ḡorei Babel.†Babel Nonorana me Hebrew ponanei nuaraḡaraḡa. Ma melagai ḡaeḡaena voana i voterei. Bada taui i vilamonei dobu au anatapuna.