7 Mai Israel Bada i viborumei maranai Joshua lawalawaina i mamae ma i ʼraḡe ma kimtana magumagurii biaḡa i mamae i ʼraḡe-pai, wei ravai Bada kaua ḡaeḡae i kauei i vimatematei.

8 Nun natuna - Joshua Bada ana taunola ana madeḡa 110 ma i ʼraḡe. 9 Ma doa i verevereia au Timnat Herek i doboi, Ephraim au olana, wei lamna Ola Gaash ana au laubadei.

10 Anina ma wei kimtana i nepai amamai awarii ma kimta ḡelauna ai gabu i vaia. Wate taui Bada eḡa ita aramanei ma nanare aiwai i kauei mai Israel aubai. 11 Ma kaua apoapoei i kauei Bada awarina ma Baal kokoitaui i raudunelei. 12 Taui Bada amamai ai God i votere-tawanei; Wei Godna taui Egyptei i taravaina-opunei. Ma i nae ma dobuḡela ravai au ririvai maemaei ai god i viborumei. Wei kauana Bada i viamlo-ḡaiḡaini. 13 Taui Bada i voterei ma Baal ma awana Ashtoreth kokoitaui i viborumei. 14 Ma Bada amlona i ḡaiḡai kaua mai Israel awari, da i veredamanei ai ḡavia awari ma taui ai purapura i tama-naiei. Ma i voterei ai ḡaviai maḡamaḡaui au ririvai awari, ma taui eḡa tagotagogina da ita vobelei. 15 Bada mai Israel i viḡaviei maranai i opuopu viḡavia aubaina. Lamna aubaina eḡa ita vovaiuba Bada i ririwei nanare. Ma taui i vinuabola kaua.

16 Anina ma Bada taurauetara bo ḡavia babadai i terepai, da i voagui da ai ḡavia i vovaiubai. 17 Wate taui ai taurauetara i parivirevirei ma god ḡelaui i erawei ma i raudunelei. Taui laḡilaḡina amamai i bababara lana i voterei ma Bada i rau-aḡaiḡaiei. 18 Bada mai Israel ai tou i nonori menanare ai ḡavia taui i rau-iviapoapoelei. Bada taurauetara i terei ma i voagui ma i gagaloei. Maranai taurauetara i mae, Bada mai Israel i raunuapoapolei. 19 Wate maranai taurauetara i ʼraḡe, rava, Bada i mae-puputei ma i apoapoe kaua eḡa me amamai nanare ma god ḡelaui i vitaunolei ma i raudunelei. Taui i geduai kaua da ai kauai apoapoei ma ai ora pota ita voterei.