1 Siwan ga. Nata ga ganindamuba Jesue natapi kekeknga sikutde natake nata gae natapa natane waaknga singgakge ganinggat. Jesu Kraisda gae musip kwikwik natanggamuke kekekanggaman yuyo. 2 Sike wamu kuupbam nata aminu buyambam yanikapa natapbuyak kakngakan natanggamatayo. Natanggamatake aminu kundu gata ie banip singgayak aminde wamu waaknga yami take wa aminda aminu kunduatde yamuningge tasiyo.

3 Gata puya waaknga Jesu Kraisde tasingamuke yuwawi iwandata enake meya takngatu takngatu gae gamanu gata akekekake yuyo. Unzing amak aminu tapatuta akekekake tasinggak binga tasiyo. 4 Sike ie natake tuwang wamu kundue natake ganiwit. Aminu amak amin dakngawiu waapa inane tupan tapae natake ita ie take natangamikge tasiwik. Tasike amak aminu waapa amakge puya akngata gitna gwa takutde ita puya takngatuat tasinanga dua. 5 Gatu aminu ayapbitnangge isapmakengu ita mama wamu ayapbitnangatane aknga katak tawamsok. Sike ita dua tawake ngana isapmake tuwangu tupan siknga yapbimbik. Yapbiban ngana sanga dua imuning. 6 Gatu aminu puya kekeknga pasike nanam zak kwaike kayuwiu waapata nanamu puya waangane buya aawa ita gamok papik. 7 Gata tuwang wamu takngaat takngatuat nata wa yanggatde natagwaanguwi Buyambam tapaninda gatane natdetdetda tapan kakaawik. Tapan kakaawan gata tuwang wamu wa kuupbamdane yapii atnatapiyak.

8 Sike gata Jesu Krais akumbut katangga gatuna enakut tapae natanggamatayo. Ita baminu Devitdane dongune aakut tapa unin. Ie natake nata wamu takeaknga yanikapmake tasiwawa 9 aminda nae natapa aminu waiapa siwan na kaautde napmaba nata meya buyak yuat. Unzing yuwawa ngana Anututane wamde kepi umutnanga dua. 10 Unzingge nata meya wa kuupbam pake nata musipma tapa kekekawan aminu Anututa inae kapekut amin gatayamunangge tasinggat. Tasiwa Jesu Kraisda wa aminu waiaknganae toknga pananga akngane sandewan wa aminda iat gatake kakaa akngane asinggan asinggan yutningge natake tasinggat.

11 Siwan wamu takngatu ninda ie natapna kekeknga sinanga aknga anzing yakamang,

14 Siwan gata aminde musia wamu waakngata asinggan yanike pangenayo. Yanike pangenake ginu wamu takngatu takngatue ma yanganuwam. Anututa dandupan take dua siyak ngang kekeknga yaniyo. Ga atnataayak. Aminda wam takngae yanganukaing kakngata aminu tapatu gatangamunanga dua. Aho. Sanga waakngata aminu wamu ayanganukaing kaknga nataaing aminu apasiwan maikaing.

15 Siwan ga Anututa gatane puyaka kawan take siwikge natake gata siakan wam taknga katak siknga yanikapmake tasiyo. Tasike Anutue kaine yutnangge dua maakawiyak. 16 Sike aminu kunduta wamu yumdekanu takngatu takngatu yapiina wena yanindamukaingge gata akagwaumso. Ga atnataayak. Wamu waakngata aminu kaipake kepi masa Anutue imunanga apane pakuwik. 17 Ngan. Wata wai gwenduta sitake kunggawan kunggawan buyambam siknga siwik. Ina unzakan. Wamu waakngata aminu buyambam pasiwan maining. Siwan aminu wamu waaknga yakaikat nana tapaaya umana Haimenias gatu Failitas ngang yanikaing. 18 Wa tapaatda siakan wam taknga teke wamu gutonga anzing yakamayak. Anututa ninu akumbumang katangga gatu gwa pangenawan ninu gatu dua enatnim ngang yakamayak. Sike wamu waaknga yanindamuke aminu kundu siakan wam takngae natapa kekekakut amindane natdetdetna pasiwat maikaing.

19 Siwan ngana Anututa inane aminabamde katak siknga atnataak. Sike aminu Anutue natake nindane Buyambam tapanin ngang inikaingu wa aminda masa waiakngae imunong. Unzing aminu yot mitapsa tapatuta gwau kekeknga siknga daka kwaiwik. Ina unzakan. Wamu wa Anututa inane aminabamde katak siknga atnataak ngang yanggat takngata Anututane aminabamde musia papan kekekakaing. Gatu aminu yot mitapiu waapata natake aminda you wagwen kake toiknga na ngang natapningge umana gwau wandakane matawik. Ina unzakan. Wamu waakngata yeutniman ninu Anututane amina dakngake yuamang ngang natapnim.

20 Siwan ninu atnataamang. You buyambam gwene dis ba botol ba sanga apamunanga yuaingu wa kundu sanga gamanggamanata pasikaing. Gatu kundu sanga waenga kayata pasikaing. Siwan dopangu kundu kuut katap gom pasike pasikaing. Gatu gapma kaikga tumuke pasikaing. Sike sanga wa kundue apbakngake nanamu wa gwegwene peke naning. Siwan ngana sanga kundue natapa sanga moo binga siwanu sabasaba wa gwegwene peke paku apmupewa kuning. 21 Siwan aminu tapatuta waiakngana gatukande bitatekengu ita amin gwaang dakngake Buyambam tapanae puyana tasinangge tandakngawik. Ngan. Dis gwendue apbakngake nanamu wagwekatang peke nanggak. Ina unzakan. Aminu waapae Anututa apbakngake inane puya asimik.

22 Siwan ga natdetdeu wawi matekge musiaatang enakaing kakngae atdatakuke natdetdeu nomana aknga natake sukuyo. Sukuke gatane puyaka Jesue natanggamatake katak siknga tasiyo. Tasike notdae musip gwaang natayamuyo. Natayamuke gaat gatu aminu kuupbam waiaknganae gwa apbitateke Buyambam tapaninde inindatakaing amikatda musipza kwikwikngata yutnong. 23 Yuke gata wamu yumdekan yapiina wena yake paut tasike yakaing kakngae masa yamuyo. Ga atnataayak. Wamu wa bingata ayanganukaing kaknga tangenakgak. 24 Sike aminu tapatu Buyambam tapanindane puya amina dakngakuu waapata dua yanganuwan. Aho. Ita puya aminu kuupbamde wikake pasiyok. Pasike amindane natdetdetna usanzike wikake katak siknga yanindamumsok. 25 Yanindamuke aminu kunduta itane wamna sapdukngama kakengu ita wa amindane natdetdetna wepda papan nomatanong. Sike ita unzing tasiwanu Anututa wa aminu apba gatayaman musia tapa tekwamban siakan wamde katak siknga natapning. 26 Tupa Setenda wa amin panzike panggaganuwan itane wamna gwaamuke tasikaking. Ngana wa aminda siakan wamde natapa natdetdetna gatu anggaman siwana Setendane kataknga sandeke kuningge yanindamumsok.