2
Kaem nup biya perr tua ko munan den
Mel gira nunguning mu iwita ko balsam: kariimet suen la nongoma tata ale Kaem amilmil tuata ale mel ko guranek te isua mu mel gira iwita pempem bita se, king arika se ali sor supuling alo, se ana suen la bagara lila se bagara yawara te baga se Kaem kagin ningi laili kau se laganakko ko guranek beteralko.* Romans 13:1 ago arikko. Munan umu munan ningo, se Kaem nanga Saonga ko kotam mu munan umu ko amilmiloso. Noko gomang mu kariimet suen la nunga sangaru tauk se den nunguning ko ikimonko gomang aniso. Kaem ko gomang: 2 Peter 3:9. Paul ko ura: Acts 9:15. Mu awuk, nu kota suanta nu Kaem, se noko kariimet nongorak nunga kusumuri mu kari suanta tala bagoso, mu Jesus Kristus. Nu kariimet suen la nunga dia taukko kota numi kuera mateng te beteram. Mu mel Kaem ko gomang motam te aniram mu tom umu te wetangaram. Se ani borta ko apostle se den gilalong bala ko kari ko aga balam. Ani me kawelasam, ani den imi nunguning tala balsam. Ani sor saki ko kariimet alo den nunguning nunga kausekko aga balam.
Bore te se, aninga angamang mu kari sor suen la te mu nongomang magara ko munan se, den tagira gurungumura ko munan ko nongomang motam gurugumon ale, munan laili te guranek te nuguting kanumonko. Se imet nunga mu, aga angamang mu iwita aniso tala, nuna mu nunumi ago kapara ko munan te guang ningo la se ko munan te nagumonko. Nuna nomone se nungumik bala duap duap se guang mel ko manga motam bibiya mu me tugumonko. Imet nunga bala nunguning: 1 Timothy 5:10; 1 Peter 3:3-4. 10 Bare imet Kaem nup biya perr tumonko mu munan ningo ningo te nunumi bala tui kam nunumi bala tumonko.
11 Imet mu kua kapamon ale kutekam baga se anapeya ikia mu ko ari ikimonko. 12 Ani imet bo kuring tuek se kari ko kausa ura bita se agi, kari ko pulawura iwita me bagarukko. Nu kutekam bagarukko. 13 Mu awuk, Adam giram nungam, asele Eve.§ Eve: Genesis 2:7,22; 3:6. 14 Se betela Adam giram kawel te me dagulam, mena. Mu Eve giram kawel te dagulam ale memek beteram. 15 Bare imet gomang ningi nunguning ko munan te baga se, kua tua ko munan karo tui se numi ko sinar taso ale laili kauso mu, noko kuriang iluwa kam te mu Kaem nu sangukko.

*2:2: Romans 13:1 ago arikko.

2:4: Kaem ko gomang: 2 Peter 3:9. Paul ko ura: Acts 9:15.

2:9: Imet nunga bala nunguning: 1 Timothy 5:10; 1 Peter 3:3-4.

§2:13: Eve: Genesis 2:7,22; 3:6.