26
Kari Yawe te la ira sanami lagara ko guranek
(David ko wur)
1 O Yawe, aga sangaruko,
mu awuk, aninga bagara aolak ko ninguru sinar tokasam,
ale ni bowa ningi la baga se, bola pala me nama taikasam.
2 Yawe, ni ani agarki gurugu ale aga
angamang motam, aga ikia ningi loager ale memek i arik mu siwu waruko,
3 mu awuk, nika kua aisa mu aninga mel gira nunguningkiri ko betesam,
ale ani pempem la nika den nunguning mu karo tui lagasam.
4 Ani kawel kariimet mu arungak me aimi gisam,
ale kariimet nungamili sorang karogo mu arungu me sorasam.
5 Ani kariimes memek duap duap bitawara mu arungak me bolala awusam,
ale kariimet ikia memek ago mu nunga dulursam.
6 Yawe, aninga bagara aolak ko ninguru
sinar tasam, ale umu te ani nika altar duap te taisam,
7 ale ka wur bo nika nip te patawura mu
ilu se, nika kiwem duap duap mu ko balsam.
8 Yawe, ani nika temple laili mu ningi bagarikko kua lagasam;
mu borta te nika kimik nikim te aniso.
9 Ni memek betera ko kariimet se kariimet
nuguting gue karogo mu nongorak me aga sarumu saparko.
10 Nuna kilek memek betemonko sinar
ago bagasan, ale manga te kariimet nongomang kulukursan.
11 Bare ani mu aga bagara aolak ko
ninguru sinar tasam, bore te se gemang lila te aga sangaru toko!
12 Se aitak ani gek am bagasam;
se tom nika kariimet tai ilu biguwumon,
mu ani ni Yawe ka nip patawurikko.