27
Yawe te la pempem ira sanamara ko den
(David ko wur)
1 Yawe mu aninga nikim se aninga saonga;
buta se ani awiri ko nguangarikko?
Nu aga bitarso se ani mel bo ko me uririkisam.
2 Kariimet memek aga momon maguwumonko taimon mu,
nongota dagulomon memek tamonko.
3 Kager motam biya taimon ale aga laturmon, bare ani me ta nguangarikko;
kager kari taimon agarak kagermon ta wore ani am gek kiriyam bagarikko.
4 Ani Yawe mel suanta ko isuem mu
iwita: ani noko temple ningi pempem la ilak baga se,
noko melmasak duap duap kumik nikim
ningi mu ari se, amotam welang tai se, ko ikia to se lagarikko.
5 Se ikup kam ningi mu nu ko kuting
bowa ningi aga kaluwurok,
ale duruk bo noko duruk Zion iwita te aga
bitiruk se ningo la bagarikko.
6 Se kari memek aga momon
maguwumonko mu, aliti biya bagamon se ani kualala Yawe
ko temple ningi iwita baga se airik ale
amilmil te wur yagowom gurugek ale
tama bita Yawe tua iwita tuekko.
7 O Yawe, airik mu agiring ikiko,
gemang lila aisu ale aga guranek ikiko.
8 Aninga angamang motam balso, nika kema motam arigekko;
se Yawe, nika kema motam arigekko angamang aniso.
9 Se ni kema motam ani ago ko me kaluwurko;
gemang memek te ani ka ura kari me aga karoko,
mu awuk, ni keta ani aga sangorsam.
Ni biring me aisu ale
me agarki daleluwurko,
O Kaem, aninga Saonga Kari.
10 Aninga nang ba ilak agarki daleluwumon,
bare Yawe, ni aninga aru tagisam.
11 O Yawe, ni ka munan aga kasuruko,
mu awuk, aninga bita maguwura ko kari suen biya bagasan;
buta se nika lage diram mu te agarak namarko.
12 Ni kari memek nungarkiwer se nunga ikia memek mu te me aga ilumonko;
nuna ani aip te den kawel ninguru balsan ale aga bita maguwusan.
13 Bare ani am ninguru ko iki saperem,
Yawe ani ago ko ningo bitirukko mu ani amotam te arigekko.
14 Ani Yawe kote la loaga se kimi bita sagarikko;
ani angamang sail tuek ale sokel karogo la
bagarik se nu aninga sangukko.