35
Kaem kager kari nuguting te nanga bataguru taukko ko guranek
(David ko wur)
Yawe, awiriya ani agarak barimasan mu ni nongorak barimerko;
awiriya ani agarak kagersan, mu ni nongorak kagererko.
Ni bares ale tai aga sangaruko;
nika kager ko karem mel gi ale tai aga sangaruko.
Nika gatu mare se saenang gi ale
tai kager aga ira baguram mu nongorak kagererko.
Ni aninga adera angimik manaru ale balu, “Ani nika saonga ningo,” meko.
 
Kariimet aninga momon se kuerikko agarak kaeyawasan mu,
nunga maguwur se dolomonko;
arikaya aninga menawumonko ikia bitawasan mu,
nunga parusuwur se pelemon ale ngualamon sipimonko.
Nuna tam gawa marir itugukoyam iwita nunga itugum se
nika engel nunga diruwurok nongorak namarukko.
Nu nunga diruwurok se
lage tiromorom se palepalengam mu te maga namamonko.
 
Nuna ani ago ko dagarok kira beteman mu kumik duap bo mena,
ale ani ago ko mutim bo ilu beteman mu kumik duap bo mena tala.
Bare memek umu giris palaguk ale
nongota nunga maguwurok se tengemonko;
se dagarok beteman mu giris palaguk nongota nunga taliparukko,
nongota mutim ilu beteman mu ningi dagulomon ale memek tamonko.
Se ani mu Yawe ko amilmilarik ale aga sangaru tam mu ko nup patawurikko.
10 Se aninga adera angimik lilim la te balik,
“O Yawe, awiri nika turan a?” maikko.
“Ni mu kituwura guat alo nunga bita
maguwusan mu nunga sangaru tasam,
ale kari memek nuguting te kariimet
nosokel mena alo mu nunga bataguru tasam.”
 
11 Kari memek alo barasasan ale den kawel atumu aisisan;
nuna ani mel me ko ikia wore ko aga isarsan.
12 Nuna aninga kiwem ningo mu ko koma kiwem memek agate betesan,
se ani angamang motam dagulam.
13 Bare tom nuna kuera ikes tokasan mu
ani nuna nogo ko inang bitakasam ale Kaem kote wosenga kira lagakasam;
ale wosenga koma me tokasam mu
14 ani mo nia lagakasam, bola aninga tiran agi aga launuria bo ko iwita.
Ani angamang bataga te magi lagakasam,
bola aninga ayam kuakoyam mo lagakasam.
15 Bare tom ani ikup te dagulem mu nuna ilu biguwuman ale amilmilakasan;
kariimet saki aga bita maguwumonko ilu biguwukasan bare ani me ko ikikasam;
nuna ago ko bala memek wore me ta bita tokasan.
16 Ani dagulukasam mu nuna gira awom la aga balu maguwukasan;
nuna ani ago ko nongomang magakaso se nogore usikasan.
 
17 O Kari Biya, awuk am suwutata nungarki se lagerko e?
Nuna lion iwita daong ko geragasan;
buta se ni aninga tagi bataguru to se nuna me aga maguwumonko.
18 Buta bitar mu ani kariimet nunga
biguwura motam biya ningi den ningo amilmil balu kisekko;
ale kariimet biya ningi nika nip patawurikko.
19 Kager kari memek alo me aga kuawara mu nungarkiwer se
aga kiamon amilmilamon ale nomotam kui me parang parang mamonko,
mu awuk, kumik duap bo mena.
20 Nuna den bo nongomang lila te me ta balsan,
bare nuna kariimet yawarakala dagiman
ale kutek maman bagasan mu den kawel atumu nungarsan.
21 Nuna den atumu ani aisisan ale balsan,
“Aha! Aha! Karkaman bo! Ana namotam kuagi te kiwem memek bitawerem se karkaman!” masan.
 
22 O Yawe, kiwem imi ni ari saperem;
buta se kiring me kaloko.
O aga Biya, aga bitar ale awar biya me bagerko.
23 O Kaem, aga Biya, bares ale tair aga sangaruko!
Ni ani ago ko sanamirko.
24 O Yawe, aninga Kaem, nika munan ningo diram la mu te,
ani angimik te memek bo mena mu aga wetang saparko;
ni nungarkiwer se me ta aga bita maguwumonko.
25 Ni me nungarki sager se balmon,
“Ese, terong, ana mel nangamang te aniram mu kumik te aratam!” mamon,
ale balmon, “Ana nu menawura biya menawuman!” ma balmonko.
 
26 Arikaya ani ikup ningi kaperem se
amilmilakasan mu, dolara nungaru ale nunga ikia ngualawurko;
arikaya ani memek kituwura ko aga balsan
ale nuna ningo yawara ko nunumi betesan mu,
dolara nungaru ale nunup karogo kaparko.
27 Ni ani angimik memek bo mena mu wetang aga sapar se,
kariimet aga kuawara mu ngata betemon ale amilmilamonko.
Nuna pempem balmon, “Yawe nup biya tunakko!
Nu noko ura kari bituok se ningo la bagarukko kueso,” mamonko.
28 Buta se ani nika munan ningo diram la
mu ko balu se, pempem nip patawu se lagarikko. Nunguning.