36
Yawe ko kua nangara mu kalel biya nunguningkiri
(David ko wur)
Kaem ko den bo aningate tairam,
mu kariimet memek bitawara wore nunga memek ko den:
Nuna Kaem ko me nguanga gilingisan.
Nuna nongota nunumi ko ikisan mu nuna terong ko nunumi balsan,
bore te se nongota nunga memek mu ari ikimon ale nubiring tumonko me terong.
Nononga nuguring te mu den memek se den kawel la arataso;
nononga ikia maga saparam se kilek ningo bo me betesan.
Nononga anira kuwim te taga anisan mu,
kilek memek betemonko mu ko ikia to lagasan;
nuna ikia memek karo tumonko gira bagasan,
ale ikia memek me ta biriruwusan.
 
O Yawe, nika kua nangara mu kalel biya nunguningkiri,
se nika munan nangarak pempem la bagara mu taiti nuwi kiaram.
Nika munan ningo dirkiriyam mu duruk bibiya sokel ago iwita;
se nika munan diram la tutera mu du biya nunguningkiri.
O Yawe, ni kariimet se mel bibiya se
gotektek duap duap nunga bitarsam se ningo la bagasan.
Nika kua nangara kumik menara mena
mu anananga mel yawara nunguningkiri!
Se kariimet nika luman bowa nagusan se ni nunga ira kaluwusam.
Nika kawam ningi na ningo ningo nungarsam se no gilingisan,
se yu ningo nungarsam se nasan ale amilmilasan.
Mu awuk, ni marak pempem bagara ko duap;
nika nikinang mu ana nikim nangarso.
 
10 O Biya, nika kua nangara kumik menara
mena mu, kariimet nika iki karo tui lagasan mu nongote pempem ani se lagarukko;
nika munan ningo nunguningkiri mu, kariimet diram la karo kisisan mu nungaruko.
11 Nunumi patawura ko kariimet mu
nungarki sager se ani nusuwik te me aga eremonko,
ale nuguting te me agarak kagermonko.
12 Arigalko! Kariimet memek bitawara mu dagulaman aniwasan;
nuna dagulaman ale udagi me barasamonko!