38
Kari bo kota ko memek ko ikup iram se Kaem sangukko aruso
(David ko wur; wosenga den)
O Yawe, gemang memek te ani me ining aisuko;
nika gemang memek te aga memek koma me aga maguwurko.
Mu awuk, nika gatu mare ninguru angimik ningi namaram;
nika kiting ninguru aga maguwuram ale agarak kaparam.
Nika gemang magara ani ago ko mu kuera yaman ninguru aisam,
ale aninga asokel menawu saparam.
Aga memek mu ninguru aga iramuru saparam;
mel bo ikup biya iwita se giekko me terong.
 
Lot angimik te mu kiri moman ale siring kapa gilingisan;
mu aninga ngualara owore ko koma.
Ikup ninguru aga iram agarak kaparam se am aliti biya bagasam;
ani woremkalal maiya am niara ma te la baga lagasam.
Aninga asusuru yaman mu tama iwita barasoso,
aninga angimik lilim la yukuwa saparam.
Ani menarem ale angimik sokel mena saparam;
ani angamang motam yaman karogo nia kika lagasam.
 
O aga Biya, aninga angamang motam mu ni ari saperem;
aninga niara kikira mu ni ko iki saperem.
10 Ani angamang motam daung daung maso ale angimik sokel menaso;
amotam tiromorom iram se sor arigekko me terong.
11 Aga lot gawir ewere te se, aga gue
suan alo se aga sikisaki alo aga dulursan;
aga bagara suan alo mu ago ko awar biya bagasan.
12 Kariimet aninga momon se kuerikko mu aninga dagarok kira gilingisan,
se kariimet ani yaman aisimonko mu aga maguwumonko balu gilingisan;
nuna ani ago ko bala guruga wore me ta bita to arigisan.
 
13 Bare ani mu kari bo dogowa mena se den me ikiso iwita bagasam;
kari bo kuring mena se munakarukko me terong iwita bagasam.
14 Nunguningta, ani kari bo dogowa den me ikia iwita bagasam;
kuring mena se den koma me balukko iwita bagasam.
15 O Yawe, ani ni ko ko kimi bita lagasam;
O Kari Biya, aninga Kaem, ani ni agiring ilupko kimi bita lagasam.
16 Ani nika manem, “Ani ikup te dagulek mu aga kager kari alo mu me nungarki sager se aga eremon ale amilmil te nunumi me patawumonko,” maem.
 
17 Se aitak mu ani dagulekko pingi arem;
aga yaman mu angimik te am aniso.
18 Ani memek beterem mu ni kema te apusam;
ani ikup beterem mu ko angamang ninguru batagoso.
19 Aninga kager kari alo mu suen biya se nosokel aora biya;
nuna ago ko me kuesan bare mu kumik duap bo mena.
20 Nuna ani munan ningo betesam mu ko
koma mu munan memek mu agate betesan;
nuna ani munan ningo betesam wore ko ani agarak barimasan.
 
21 O Yawe, ni me aga bitarko;
O aga Kaem, me aga bitar ale awar biya bagerko.
22 O aga Saonga Kari,
urtuk la tair ale aga sangaruko.