41
Kari kuera ikes ago baga se ko guranek
(David ko wur)
Kariimet awiriya kariimet kituwura guat nunga sangorsan mu amilmilamonko;
tom nuna nongota ikup memek ningi kapamon mu Yawe nunga sangukko.
Nu nunga bituok se tom maiya biya amilmil te ali imi te baga lagamonko.
Nu kager memek nuguting te nunga bataguru taukko.
Tom nuna kuera ikes ago bagamon mu nu nunga sanguk se nungemonko.
Ani iwita Yawe aru manem,
“Ani ni kema te memek beterem,
bare gemang aisu ale kuera ikes ewere siwu waruko.”
Kager kari memek nongomang memek karogo iwita ago ko balsan,
“Nu yam kua namaruk se nup mena namarukko,” ma balsan.
Tom nuna ani agarkamonko taisan,
mu nuguring guang te agarak wosengasan,
bare nongomang motam mu kigilik aniso;
se namasan mu kariimet biya ningi aga balu maguwusan.
Aga kager kari memek bolala awusan ale abiring ko kasikasisan;
nuna balsan, “O memek biya taukkowo!” masan.
“Kuera ikes memek nunguningkiri iluwam, se me ta nungerukkowo!” ma balsan.
Aga yawara, aga ilup se isirek,
ani nu ilak am suanta, mel katirta wete nasan,
bare buring gurugu aisam tala.
 
10 O Yawe, gemang aisu ale aga sangaru
se ani nunga memek koma bita nungarikko!
11 Tom kager kari memek kager te me aga
kiasan mu te, ani ikisam mu ni aninga kuesam.
12 Ani kiwem memek bo me beterem, buta se ni aga sangorsam;
se ani ni kema te baga se lagarikko.
 
13 Ani Yawe nup patawurikko, nu ana Israel nanga Kaem,
nup biya pempem la butata anirukko!
Nunguningta se nunguningkiri!