42
Ikup kam ningi Kaem kote la ikia loagara bita se laganakko
(Korah ko kuriang alo nunga wur bo)
Aga Kaem, deer yu ko dogotak marakaso se yu kupuso iwitatala,
ani yu ko kuakoyam ni kimik duap te bagarikko ninguru kuesam.
Kaem, ni Kaem marak duap;
se ani angamang angimik lilim la ni kerak bagarikko.
Ani pa amaru aga Kaem koma te nama aratikko ya?
Ani tirom woremkalal amononge kapa lagoso,
se kariimet pempem la aga isarsan, “Nika Kaem apoko ya?” masan.
Ani girakala kariimet nunga girikasam
ale nongorak Kaem ko temple te namakasam,
ale nama se amilmil te aikasan, Kaem ko wur ilu se nup patawukasan;
umu angamin te taiso se angamang motam ninguru batagoso.
 
Aninga angamang motam pa awuk se dagulam?
Awuk se kumik lila mena?
Bare aninga ikia, aninga loagara mu Kaem kote la bitirikko;
se nu aninga sanguk se ani akingtala nup patawurikko;
nu aninga Saonga Kari, se aninga Kaem.
 
Ani angamang motam dagulam;
se yu Jordan ko supuling duruk Hermon se duruk Mizar te baga se,
ni ko ko angamin ares maso,
mu awuk, ani nika yu tengeso ale tai tagoso nirung kaposo
ale tamun numi moso ale namoso taiso iwita bagasam.
 
Yawe woremkalal pempem gomang aisiso,
ale tirom wur aisiso se guranek iwita ilu aga Kaem tusam.
 
Aninga Kaem mu aninga Duruk motongar,
se ani isarsam, “Ni awuk se ani ago ko kamili saparam?
Awuk se kari memek aga maguwuman
se iwitata ma niara te la bagasam?”
10 Nuna kowarkalal maiya la nusuwik sapara den balsan,
ale masan, “Nika Kaem apoko ya?” masan.
Den imi ani mare iwita angimik
barukuso ale ningi namoso se ani kuerikko kaesam.
 
11 Aninga angamang motam pa awuk se dagulam?
Awuk se kumik lila mena?
Bare aninga ikia, aninga loagara mu Kaem kote la bitirikko;
se nu aninga sanguk se ani akingtala nup patawurikko;
nu aninga Saonga Kari, se aninga Kaem.