44
Kariimet Kaem aking nunga sangukko wosenga kira gilingisan
(Korah ko kuriang alo nunga wur bo)
1 O Kaem, ni girakala anananga taleng
girigir alo nunga tom te kiwem aora bibiya beterem;
dugu duap mu ana nainet alo nanga
manorman se ana nadogowa te ikiman.
2 Ni keta kariimet iwareng nunga karo parusuwurem
ale ali mu anananga girigir alo nungarem se te yawarakala dagiman;
ni kariimet iwareng umu nunga munan memek koma nunga maguwurem,
ale anananga girigir alo nunga bituem se gue pagam namaram.
3 Nuna nongota nunga kager ko mel te,
agi nongota nunga nosokel te ali mu me bataguru taman, mena;
bare mu nika kiting, nika sokel te,
se ka kimik nikim mu te kager mu menawurem;
mu awuk, ni ka gemang motam ka kariimet ko aniram se uwutata beterem.
4 Ni aninga Kaem se aninga King;
ni balsam se ana Jacob ko kariimet gue kager te marirasan.
5 Nika sokel te ana nanga kager kari nunga karosan;
nika nip te la ana kager nunga sail menawusan.
6 Ani aga gatu mare karogo, bare umu te la me ira sanamasam;
se aga saenang karogotala, bare mu te la betela me marirasam.* Saenang mu girakala ko baenat.
7 Bare ni nanga sangorsam se kager me nanga maguwuso;
ni kariimet me nanga kuesan mu ngual nungarsam se dolasan.
8 Se Kaem, ana nika saonga mu ko ka balu patawu lagasan,
ale nika nip pempem la patawu se laganakko.
9 Bare aitak ni biring gurugu nangarem ale nanga ira kutuwurem;
ale aitak ni anananga kager kari kager te me nunga sangorsam.
10 Ni uwuta beterem se ana kager arigiman ale naguman,
se nuna anananga melmasak gi gilingiman.
11 Ni ana sipsip nunga momon se
kuemonko negawasan iwita nanga beterem,
ale nanga parusuwurem se ngual ngual
namaman ale kariimet iwareng nunga ningi bagasan.
12 Ni ana ka kariimet nanga merem ale
diara kari iwareng nongote nanga ilu arigem,
se manga koma aliti ta te nanga diaman iwita,
ni manga bo biya nongote me taem.
13 Ni uwutata nanga beterem, se kariimet
nangimik duap te bagasan mu nanga balu maguwusan;
kariimet saki mu nanga gusirsan ale den dolara nanga manorsan.
14 Ni buta maem se sor saki ko kariimet den dolara nangimik ko balsan;
ale kiwem nago ko aratam ewere ko ninguru gusisan.
15 Se ani pempem la aimi ari maguwu lagasam,
se dolara mu angama sengem te aniso,
16 mu awuk, kariimet agarak kagersan mu dolara den aisu lagasan,
ale agarki maguwusan ale aga gusirsan.
17 Munan memek imi suen la nangimik te aratu saparam,
bare ana ni ko ko nangamili me sapakaso,
ale ni ikia den nangarak kalem mu me kulukurukasan tala.
18 Ana nabiring gurugu me kisiman,
ale nika munan se nika lage nangarem mu nabiring me tuman.
19 Bare ni anananga maguwurem ale
kausik diwang nunga ningi nanga awurem;
ale tiromorom biya te nanga iramurem.
20 Ni anananga Kaem, se ana nika nip me ko nangamili saparam;
ana nagiting patawuman ale kaem kawel bo ko me ngatangaman.
21 Uwutata beteman le, mu ni am ko iki saparko tala,
mu awuk, ni anananga ikia yumura mu ni yam ari iki sapasam.
22 Ana nika kariimet ko bagasan, se tom suen biya nanga mosan se kuawasan;
ana nangarkasan mu sipsip nunga momon
se kuemonko lage te bagasan mu iwita nangarkasan.† Romans 8:36 ago arikko.
23 Kari Biya, baresko! Ni anape ko aniwasam?
Ni baresko! Ni biring nangara biya me nangaruko!
24 Ana nanga bita maguwuman se ikup tawun biya ningi bagasan,
bare ni anape ko ana nago ko kema kaluwusam ale kamili sapakoyam bagasam?
25 Ana ali te dagulu parasaman ale kariimet kuera iwita aniwasan.
26 Buta se ni bares ale tai nanga sangaruko!
Ni ka kua nangara ko munan wore ko kamin ares mauk, se tai nanga
sangaru se ana me kua namanakko!