45
King imet tam ko den
(Korah ko kuriang alo nunga wur bo)
1 Den supuling yawara bo aninga
angamang motam ninguru atumuso se ani king koma te balu tuekko;
aninga angamili mu, garek ko kari ningo bo ko bugu yawara te garekoso wore iwita,
se ani den te gurugek patawurikko.
2 Ni kari ningo yawara, se kari bo bo nika iwita mena;
nika kiring mu marolila ko den karogo;
Kaem uwutata nika beteram owore te se
nu pempem la marak ningo kisu lagoso.
3 O king sokel karogo, nika saenang to ale ka luan karogo ituwurko;
ni ka nip biya se ka sokel aora biya mu kager ko bala iwita tugumko.
4 Ni nip biya mu karogo kager te namar ale marirerko;
nika kager mu, den nunguning se bagara ningo diram mu ko ni kagersam;
namar ale kiwem bibiya bitarko.
5 Gatu mare kore tamatama mu kager kari memek nokosopas atumu barurumumonko;
sor sor ko kariimet nika siwik duap ningi la kapamonko.
6 O Kaem,*Imi te Kaem ko balso mu king ko balso, mu awuk, king mu Kaem kota ura tuam se nu Kaem koma tata bagoso. Hebrews 1:8 ago arikko. nika king ko bagara mu pempem la butata lagerko,
se munan ningo diram mu nika king ko tam iwita, nika kingdom te bitaruko.
7 Ni munan ningo ko kua lagasam ale munan memek mu ni biriruwusam;
buta se Kaem, nika Kaem, mu amilmil oil sipiling te waram,
ale ka saki alo nunga ningi,
ni kualala biya ka beteram se bagasam.
8 Ni guang balayam nagurem mu mel
siring yawara yawara karogo terong mam;
nika kawam bala duap duap wore te bala tuman,
ale ni amilmil kisimonko gita te wur yagowom gurugusan.
9 King saki nunga nanawusari se imet nunup bibiya mu karogo taiman;
se imet ni ilak nimi kiting ilup se nika niwus ko bagarukko mu,
kiting sengam mu te, sor Ophir ko bala gold te nungurman mu naguram ale bagoso.
10 Ikiko, aga nanawus, degewa gurugu ale den imi ikiko:
Ni ka kariimet se ka niet ko kawam digo lilim biring tuiko.
11 Se king ka amilmilaruk, ale ka kema motam balayam mu ko kueruk,
se ni nup biya tui se nu nika bituokko.
12 Sor Tyre ko kariimet nungumik mel suen biya karogo mu
gemang kulukurmonko munan duap duap karogo tai kisimonko.
13 Imet kulak king aguwam mu ko guang
mu nikim ago se gold awote biliwilik bagara se ko ariga yam yawarakala;
14 se ko melmasak mu karogo diruwuman ilak king kote namaman;
se itiwik kulak noko saonga mu karogo
nunga diruwuman nongorak namaman;
15 nuna amilmil te nongorak king ko kawam ningi kasu naguman.
16 O king, nika kuriang kari bilangamon, ale
ni, ka niet alo nongorak iwita, nina nigiwim tamon ale ninga ali sor bitarmonko.
17 Ani nika nip biya wetang saparik se
kariimet gue udagi taiwasan mu ikimon se sor suen la nika nip mu
patawu se lagamonko.
*45:6: Imi te Kaem ko balso mu king ko balso, mu awuk, king mu Kaem kota ura tuam se nu Kaem koma tata bagoso. Hebrews 1:8 ago arikko.