55
Kari bo ikup biya ningi kaparam ale ko ikup Kaem kasurso
(David ko wur)
1 O Kaem, aninga guranek ikiko!
Ni aninga niara imi ko degewa me bagurko.
2 Aninga wosenga imi iki ale agiring ilupko;
ikup imi aninga maguwurokko nunguning iwita se angimik gawa kaparam.
3 Kager kari aninga maguwumonko balsan,
ale ani ninguru agarak kapa gilingisan;
nuna ikup ani angimik te betesan,
ale agarak balsan ale agarak barima gilingisan.
4 Ani angamang dung dung maso,
se kuerikko betela nguangasam.
5 Nguangara biyala angimik te taiso ale angimik sail menawuram,
se angimik barowara maso.
6 Ayo-o, ani inangnang arum iwita luman gemarik ale bingek awar biya namarik ale aeman saparikko.
7-8 Ani kuwim yumura bo,
kariimet mena se awar biya,
wore te biririka namarik ale tuwik marir ewere ko yumurekko.
9 O Kari Biya, kariimet memek alo nunga
ikia ngualawur ale ikia betemonko mu menawurko!
Mu awuk, ani kager daong ngual ngual
wonong biya ningi ari lagasam.
10 Tirom kowarkalal nuna ikup betemonko wonong karo gurungumu lagasan;
se wonong tuagu ningi kariimet nunga bita maguwura ko munan mu ninguru aniso.
11 Munan memek duap duap barasam ale
wonong tuagu ninguru maguwuram;
kariimet nguangara tua ale kote mel gia,
se kawel ko munan sor lilim iram.
12 Aninga kager kari memek alo nunga bo
ago ko bala memek balam le mu,
ani ko ikia tawun biya me aga moso le.
Agi nu numi biya ko iki se ani kituwura ko aga beteso le mu,
ani am abiring tui namasam le.
13 Bare mena. Mu nigita, kari aninga turan tala,
aninga bagara suan se aga yawara, nigita munan owore bitakasam.
14 Ni analak nanimi ninguru gikasan,
ale kariimet sang nongorak Kaem ko temple ningi namakasan ale Kaem nup patawukasan.
15 Aga bita maguwura ko kari alo mu kuera mateng nunga iluwok se
marak loaga se kari kuera nunga mutim ningi kapamonko!
Mu awuk, nononga nongomang motam se nunga bagara mu kiwem memek karogo terong ma saparam.
16 Bare ani Yawe, aninga Kaem, mu aurik se nu aninga bataguru taukko.
17 Turomola, woremkalal, bainga ningi ani ikup yaman ningi nia kika lagasam,
se nu agiring ikiok ale aga sangukko.
18 Suen biya agarak kagersan, bare ani ikup bo me arigekko,
mu awuk, nu aga bituok ale aga bataguru taukko.
19 Kaem, king ko pempem la baga lagoso,
mu aga niara ikiok ale aga kager kari nunga menawurokko;
mu awuk, nuna nu ko me nguangasan,
ale nunga munan memek mu ko me giris palagasan.
20 Aninga tiran yawara mu noko sikisaki ikup ningi nunga waram;
ale anananga ikia kaloman mu kulukam.
21 Kuring te mu den welang welang balso,
bare gomang motam ningi mu kager ko tama iwita kaniwoso;
noko den mu malin kaukoyam ikiko,
bare den mu batir iwita nanga bataguruwoso.
22 Nika ikup suen la Yawe kuting te bitarko,
se nu giok ale nu nika sangukko;
nu kariimet ningo diram mu
nungarkiwuruk se memek bo me arigimonko.
23 Bare ni, O Kaem, mu kariimet memek
alo mu nunga karanguru se kuwim memek mu te namamonko;
kawel kari se kariimet nunga mora se
kuera ko kari mu kulak la kua namamonko.
Bare ani agata mu, nikate la ira sanami se lagarikko.