56
Nguangara biya ningi Kaem te la ira sanamara ko wur
(Philistia alo wonong sor Gath mu te David ilu talipaman se nu wur imi batogam)* 1 Samuel 21:10-15.
O Kaem, gemang motam lila aisuko,
mu awuk, kager kari memek aninga momonko aga karo lagasan;
nuna kowarkalal maiya ani memek te aga bita gilingisan.
Nuna nonoman sapara mena agarak kagera lagasan;
nuna suen biya se nunumi patawusan ale agarak kagera gilingisan.
 
Tom ani nguangasam mu aninga loagara suanta mu ni aninga sangaruko mu te betesam.
Ni aga Kaem, ani ka den ko amilmilasam,
ale nikate la ira sanamasam, ale me nguangasam.
Ali ko kari bo awuk ta aga maguwurokko?
 
Nuna kowarkalal maiya dagisan ale den bo te aninga bita maguwumonko wore kupu lagasan,
ale nuna aguwaya aga maguwumonko wore ko balu lagasan.
Nuna yumusan ale aninga tigiru lagasan;
nononga ikia biya mu aninga momon se kuerikko.
O Kaem, ni nunga memek koma nungaruko!
Nika gemang magara te kariimet umu nunga maguwurko!
 
Ani ikup giem ale karogo mo se memek baga lagerem mu ni ko iki saperem;
ni aninga amononge awilaya kaparam mu ni kau saperem ale ko ikisam.
Se tom ani nika aurik mu ani ikisam, aga kager kari mu nagu sapamonko.
Umu te ani ikisam, Kaem mu aninga saonga bagoso.
 
10 Ani Kaem ko den ko amilmilasam,
ani Yawe ko den ko amilmilasam.
11 Ani Kaem te la ira sanamasam, ale me nguangasam.
Ali ko kari bo awuk ta aga maguwurokko?
 
12 O Kaem, ani aga den balem uwutata
bitirik ale amilmil te tama bita kisekko.
13 Mu awuk, ni ani mateng lage te aga bataguru taem,
se ani asiwik atumem ale me dagulem;
buta se ani Kaem nup patawu se, marak ningo ko nikim te la aolak iluwekko.

*^ 1 Samuel 21:10-15.