59
Kager kore memek ningi baga se Kaem ko saonga ko aira
(David ko wur; Saul ko kager kari alo David ko kawam laturman ale David momon se kuerukko bagakasan)*1 Samuel 19:11.
1 O Kaem, kari memek nuguting te aga bataguru toko;
kari ani agarak barimawasan mu nunga, aga bitaruko.
2 Nuna kari mora se kuera ko kari,
mu nuguting te aga bataguru to ale aga sangaruko.
3 Arikko! Nuna yumuman ale aninga momon se kuerikko loagawasan!
Nuna kari memek alo nunguningkiri se
ilu biguwuman ale ani agarak kagermonko.
O Yawe, nuna uwuta aga betesan mu am
kumik duap bo mena nunguningkiri.
4 Ani memek bo me beterem,
bare ani agarak kagermonko bagasan.
O Kaem, ni bares ale aga sangaruko!
5 O Yawe, ni Kaem Sokel Garagar, ni Israel ko Kaem,
ni bares ale kari memek alo mu suen la nunga maguwurko,
nuna memek nunguningkiri se me ta nunga gemang nungaruko.
6 Nuna tirom pelesan taisan ale wonong
karo gurungumu se kausik iwita kager ko ngararak ngararak geragasan.
7 Nuna nuguring te den balsan mu memek biya,
batir kore wuli tamatama wore toroman,
ale balsan, “Awiri ‘mena’ maukko? Mena!” masan.
8 Bare O Yawe, ni nunga gusisam;
ale nunga den alel balsam.
9 Ni aninga Sokel, se aga sangaruko nikate la ira sanami lagasam;
O Kaem, ni aninga yumura kuwim,
10 se ni ninguru aga kua lagasam;
se ani ikisam, ni aninga sangaru se kager kari memek umu abowa nunga tugumekko.
11 Bare aninga kariimet me ari ikimon bore ko, O Biya, anananga Karem,
ni pasak ala kari memek umu me nunga moar se kuemonko;
nika sokel aora mu te nunga bila ale
nunga parusuwur se nungumik sokel menarukko.
12 Nuna nuguring nungamili te den kawel
se nunumi patawura ko den aratu lagoso,
bare mu giris palaguk ale nunga taliparukko.
Nuna den memek te saki alo nunga balu maguwusan,
13 buta se nika gemang memek te nunga
maguwur ale nunga menawu sapar se menara biya menamonko.
Ni uwuta bitar se ali sor suen biya ko kariimet te ikimon ale balmon, “Jacob ko Kaem nongorak bagoso.”
14 Aninga kager kari mu tirom pelesan
taisan ale wonong karo gurungumu se kausik iwita ngararak ngararak geragasan.
15 Nuna na ko loagasan geragasan,
ale me arigisan mu am ngus ngus geraga lagasan.
16 Bare ani nika sokel aora biya mu ko wur iluwekko;
turomola pempem mu ani nika kua nangara mu ko wur iluwekko;
mu awuk, ikup kam ningi mu ni aninga
yumura kuwim, se aninga manga gek am.
17 Ni aninga Sokel, ani wur iluwek ale nip patawurikko;
O Kaem, ni aninga yumura kuwim,
se ni ninguru aga kua lagasam.