60
Yawe kota suanta Israel alo nunga gatu supuling
(David ko wur, kariimet nunga kausa ko. David sor Aram Naharaim se Aram Zobah ko kariimet nongorak kageraram ale wur batogam. David ko kager supuling Joab kager te pila se, Edom kari twelve thousand, sor wolong “Valley of Salt” masan mu te nunga moram se kueman.)* 2 Samuel 8:13. Valley of Salt mu sor wolong bo Dead Sea duap te.
1 O Kaem, ni ana nago ko gemang
magaram se biring gurugu nangarem se
kager utu naguram ale nasokel menawuram;
bare akingtala nanga sangaruko!
2 Ni wanara sor maguwu kam anananga ali yukuem,
se papak mam woselaram ale yukuawoso;
bare tair ale nunguru burangir se kuwim kuwim te aking pelerukko.
3 Ni ana nika kariimet ikup ninguru nangarem,
se kariimet yu aora nana ale dagulu barasukam ana dagulu barasuwasan.
4 Bare ni gatu supuling se ka gatu patawurem,
kariimet ni bowa ningi bagara mu tai nikate la biguwumon ale kager ko sokel iru tamonko.
5 Ni ana ninguru nanga kuesam,
bore te se ka sokel te nanga sangaru toko.
6 Kaem ko kuwim laili mu ningi baga se den imi balam,
“Ani amilmil te, sail te Shechem ali mu pakakumurik,
ale sor wolong Succoth mu karogo tala
parusuwu aga kariimet nungaru gurugekko.
7 Gilead mu aninga;
se Manasseh mu aninga;
Ephraim mu aninga kager ko kitigat;
se Judah mu aninga bitua ura ko tam.
8 Moab mu tawir yam bo iwita;
se Edom mu aninga asiwik gomang te bitirikko;
se Philistia ningi mu ani amilmil ngata te bitirikko.Ӡ Sor Gilead, Manasseh se Judah mu Israel ningi ko sor wonong. Se Moab, Edom se Philistia mu sor saki Israel ningi mena.
9 Bare aga Kaem, awiri ani agarak sor Edom mu te namaruk ale
ko wonong sokel aora garagar mu ningi agarak kaparukko?
10 Awiriya bo mena, mu am nigita.
Ni biring gurugu nangarem ale kager te me nanga sangarukasam.
11 Bare aitak mu ni ana nanga sangaruko;
mu awuk, ali ko kari bo ana nanga sangukko me terong.
12 Bare ana nanga Kaem te mu ana kager te mariranakko;
nu kota kager kari memek alo mu nunga waruk se kapamonko.