92
O Kaem, ni keta kalel biya nunguning pempem bagasam
(Wur imi Sabbath tom ko wur)
1 O Yawe, mel biya aninga angamang
motam ningi mu ani amilmil ni kisek ale nip patawurik,
ale wur duap duap nika nip te iluwekko, O aninga Kaem Kalel Biya.
2 Turomola pempem mu nika kua ana
nangara ko munan mu ko balu pagik,
ale tirom mu nika gemang nunguningkiri
nangara ko munan mu ko balikko.
3 Ale bawe se gita mel te yagowom
yawara gurugek ale nika nip patawurikko.
4 Mu awuk, nika kiwem bibiya te ani amilmil aisisam;
se ani nika ura bibiya ni keta kiting te
beterem mu ko amilmil wur ilusam.
5 O Yawe, nika ura mu bibiya se yawarakala;
nika ikia mu du biya, kalel biya, se ulal biya nunguningkiri!
6 Kariimet ikia ningo nongote mena mu me ta ko ikimonko;
kariimet ngualara sipira mu me ta ko sinarmonko:
7 kariimet memek mu sirsir iwita pagamon,
se memek bitawara ko kariimet mu yawarakala ko barasamonko,
bare nuna me ikisan, nuna memek biya tamon ale menara biya menamonko.
8 Bare O Yawe, ni keta kalel biya
nunguningkiri, ni pempem bagasam.
9 Nunguningta nunguning, kari ni kerak barimasan mu mena namamonko;
memek bitawara ko kariimet mu parasa namamonko.
10 Bare ni sokel aisem se aninga asokel mu buffalo diwang ko sokel iwita;
ni amilmil ningo wore aisem se ani amilmilasam.
11 Ani amotam te aga kager kari memek alo ikup yaman giman se nungarkem;
ale adogowa te niaman se nunga niara ikiem.
12 Kariimet ningo diram bagara mu tam ningo naur iwita aragamon,
ale Lebanon ko tam aora sida mu iwita tarigimonko.
13 Nuna Yawe ko kawam ningi tam ningo
iwita araga se nunguning yawara kapa se lagamonko.
14 Nuna garukamon ta wore yam nunguning kapa se lagamonko;
nuna tam iru, nunguning duap beteram ale
kaposo iwita, sokel karogo la baga se,
15 ni ko ko iwita balmon, “Yawe ningo diram la baga lagoso;
nu anananga manga gek am,
se memek bo ta noko ningi me aniso,” ma balmonko.