149
Kaem ko kariimet nunga ningo beteram ko amilmil
1 O aleluya! Yawe ko nup patawuralko!
Wur iru iluwal ale nup patawuralko;
nina ko kariimet biguwural ale ko nup patawuralko.
2 Israel kariimet, Yawe ko amilmilaralko, nu ninga nungam;
Zion kariimet, ninga King ko amilmilaralko.
3 Bawe moa se, gita ela se, iru seseka se nup patawuralko!
4 Mu awuk, Yawe nina noko kariimet ninga ninguru amilmiloso;
nu nina ninimi karogo kapaman se nu ninga sangaru tam.
5 Nu nenenga ninip biya mu bala iwita
nisipiling tugumam se ninguru amilmilaralko;
ale tirom anira tom te karogo la amilmil wur ilu se lagaralko!
6 Kaem nup biya tuata mu nina nigiring te aniruk se,
batir kore wuli kapawara mu nigiting te iluwal,
7 ale te sor saki ko kariimet memek mu nunga memek koma nunga maguwuralko;
8 ale nunga king se nunga kari bibiya mayang aora te nunga taliparal,
9 ale Kaem ikup aguwaya nunga memek koma balam mu te nunga beteralko.
Kaem ko gomang motam noko kariimet nunga mu uwutata.
Aleluya! Yawe nup patawuralko!