3 Solomoni 'Auvea i nuakalikalieni wata tamana yana veimea i vetutuyamedi. We'e nani 'aitamogana, yana 'Auvea kebu i da ve'ililibuyeniga fai yana 'anivelena-maimaiga i vevelomuyedi wata vane i kabukabunidi 'eba 'odu-'avo'avovo 'waidie 'oya siaidi deba'aidie.

4 We'e yadi 'eba 'odu'odu bwaikina 'ana 'atamana Gibioni. Bei Kini Solomoni i nago 'aisaya 1,000 i velomuyedi i kabunidi 'Auvea 'waineye. 5 'Atamananina 'waineye 'Auvea i souyeni Solomoni 'waineye 'enoneganegayega, i velutolieni i vo, 'Ai'edi ava'ai nuanuamu? 'U na velu'ui a na velemu.”

7 Solomoni i tutula i vo, 'Auvea yaku Yaubada, 'u venua'ivineku a na ve-kini tamaku yana 'eba veimea 'waineye, siwe yau 'wa da vo bola kwamana siaiku, tomotoga 'adi veto'edakumeta kebu a da 'asetaiga. 8 Yau yamu tofolova, yamu tomotogavo 'u venua'ivinediga 'awasasadie, 'adi 'aila'a bwaikaotogina lu'iawawa-wayoga. 9 Kebu tamu aitoi 'aisena 'ana fata yamu tomotogavo i na 'isave'avinidi. Bega nuanuaku nuamageta 'u da veleku, 'wainega yamu tomotogavo a na 'edakumesedi wata a na 'asetai ava'ai mogitana wata ava'ai vekali.”

10 Fai Solomoni i velu'ui nuamageta faifaina, begaidi 'Auvea i sosoana. 11 Nika Yaubada i vo, 'U velu'ui nuamageta wata venua'ivina tonovidi faifaidi, kebu 'u da velu'uieku bega yamu mia i na vemanawe 'alo 'u na ve'ai'aiwabu 'alo 'amu gaviavo 'u na luvewafadi. 12 Bega ava'ai faifaidi 'u velu'uiga, a na velemu. Nuamageta wata venua'ivina tonovidi, 'wainega kebu tamu aitoi i na salamu basenadi, 'asiau wata tutuya i mimai 'waidie. 13 Avinodi kebu 'u da velu'uiekuga 'ai'aiwabu 'alo 'amu wagava i na vebwaikaga faifaina, siwe naninidi a na velemu, kebu tamu kini ma yana 'ai'aiwabu 'alo ma 'ana wagava i na salamuga. 14 'Ai'edi yaku vona matatabuna wata yaku veimea 'u na vematayakeyakedi bani'odi tamamu Devida, yamu mia a na 'ivemanawei.”

16 Tamu tutuya 'waineye toalagogona 'adi 'ailuga i maia kini 'waineye, 'adi vita i na sivetonovi. 17 Tamu iadi i vo, Yama kini, de'e vavinenidi taiadi 'a miamia vanuga 'aitamogana 'waineye nika bei yau 'a venatuna. 18 'Aiata 'ana vetonu 'waineye de'e vavinenidi i venatuna, we'e 'ama 'ailuga vanuga 'aitamogana bei 'a miamia, kebu wata tamu aitoi taiadi 'a da miamia.

19 Tamu lovana 'waineye de'e vavinenidi natudi i 'eno-fwaseni nika yawaina i 'a'ava. 20 Lovana 'ana utukamwana 'waineye vavine i tovoi natuku i 'ewai 'waimega we'e ma'itufa natudi wafana lilivameye i ve'enovi, natuku yawayawaina i 'ewai taiadi i 'eno. 21 'Awa'aiwaiogose 'a tovoi nuanuama natuku 'a na vesusuya nika 'a 'iseni wafana. Tutuyanina mageta 'waineye 'a 'isa-'atumaia, de'e kwamananina kebu yau natukuga.”

22 Tamu vavine i vo, Kebu! De'e 'omi natumi iavetana wafana we'e kwamana yawayawaina yau natuku.” Siwe vavine kumekumetadi i vona-toketoke i vo, Kebu, wafana de'e 'omi natumi, we'e ma yawaina yau natuku.” Side bani'odi vevinenidi yadi ve'ikwayekwayega kini mataneye.

23 Bega kini i vona i vo, Vetuma a na vonemi, de'e vavine kumekumetadi i vo, 'Omi natumi wafana, we'e yau natuku yawayawaina,’ tamu i vo, Kebu! Kwamana yawayawaina yau natuku, wafana 'omi natumi.”

24 Bega kini yana tofolovavo i vonedi i vo, Kefata nigona ma vi'avi'aina 'wa maieni.” Nika i nago i 'ewai i veleni. 25 Kini i veimea i vo, Kwamana yawayawaina 'wa na tutudabalugedi bega tamu vavine vi'inega i na 'ewai, we'e iadi tamu.”

26 Kwamana yawayawaina inana natudi i 'isanuakalikalieni bwaikina, bega kini i voneni i vo, Yama kini, kwamana kebu 'u na luvewafaiga, sino vavinenidi 'u na veledi.”

Siwe tamu vavine i vo, Kebu, 'u na kinidabalugedi, nika kebu wata 'a na ve'ikwayekwayega kwamananina faifaina.”

27 Bega kini i vona i vo, Kwamana kebu 'wa na nikei, we'e 'wa na 'aniveleneni vavine kumekumetadi 'waidie, fai kumanidi inana mogitana.”

28 Tutuyanina me Isileli matatabudi kini yana venua'ivina valana i nogai, i 'asetai Yaubada nuamageta i veleni bega vita tulina tulina i sisivetonovidi nika fuedi i ve'ililibuyeni.