1 Tutuyanina Kini Devida ma yawaineye, Kini Alana i veianeni, kininina me Taia i veveimeyedi. Tutuyanina vala i nogai Devida natuna Solomoni me Isileli yadi kini, yana vona-vekaiwa i vetunei 'waineye. 2 Nika Kini Solomoni yana vona i vetunei Kini Alana 'waineye i vo, 3 'Akonadi 'u 'asetai tamaku Devida bola ma yawaineye i vevetalaga 'awalawa tulina tulina 'ana tomotogavo 'waidie, bega kebu 'ana fata Vanuga 'Eba Velu'ui i na yogoni 'Auvea yana Yaubada faifaina. Nagami i lulukamata 'Auvea 'waineye i na 'ivaiseni 'ana gaviavo i na vetoketoke-'iawedi. 4 We'e tutuya de'e 'waineye, 'Auvea yaku Yaubada mia niwalova i veleku, kebu tamu 'aku gavia wata kebu tamu vita bwaikina a da veluagaiga. 5 2 Sam 7:12,13; 1 Ifu 17:11,12Bega a vevenua'ivina Vanuga 'Eba Velu'ui a na yogoni 'Auvea yaku Yaubada faifaina, bani'odi i voneyeni tamaku Devida 'waineye. I vo, Natumu a na silakai i na ve-kini tutulimu, kumanina Vanuga 'Eba Velu'ui i na yogoni 'aku wagava 'ana subia faifaina.’

6 Nuanuaku yamu tofolovavo 'u da vetunedi 'awalawa Lebanoni welavi Sida*Sida tamu welavi fa'alina wata manamanawena. Folovanina magaina 'atumaina maliwaka 'ana 'isa'isa bani'odi, 'waidiega vanuga 'adi 'isa 'atumaidi i yogoyogonidi. i da talagidi faifaiku. We'e yaku tofolovavo taiadi i na folofolova, fai ta 'asetadi 'omi me Saidoni welavi to'aitalaga 'atumaimi, kebu bani'odi 'ima me Isileli. 'Ai'edi yaku nuanuanina 'u na sosoaneni, 'u na voneku 'aivia 'adi tutula, nika yau yamu tofolovavo a na tutulidi.”