2
Ana yadi lei-subisubia
'A sososoana 'Auvea 'waimuye,
'U kiavetoketokema.
Ma yama fwausa 'ama gaviavo 'a sidibidibiedi,
wata 'a sosoana fai 'omu 'u 'ita'ita'iema.
2 'Auvea, kebu tamu aitoi magemagetana 'omu bani'odiga.
Kebu tamu yaubada 'omu bani'odiga,
fai toketokeotogimu*'Ana mogitana vona Ibeliu 'waineye, Kebu tamu kileu yada Yaubada bani'odiga. 'u 'i'ita'ita'ieku.
3 'Omi tovona-'avo'avovo, kebu 'wa na fwausa matameye,
kebu ma yami nualaka 'wa na 'a'abigeku.
Fai 'Auvea sauluva matatabuna 'adi to'aseta,
'wa na vonayavuga mataneye vematavuloga faifaina.
4 Tolugavia toketokedi yadi 'eba vetalaga 'Auvea i baidi,
we'e egavo mweadi ma'itufa i na kiavetoketokedi.
5 Kumanidiavo 'adi'adi fuedi 'awaie i na lase,
we'e tolase ma'itufa ma kamoaidi.
Vavine kakalidi natudiavo 'adi 7 i na venatunedi,
we'e vavine natudiavo fuedi, 'awaie i na 'iawelovedi.
6 'Auvea 'asa'aiana wafa wata yawai 'adi toveimea,
'ifwaidi tomotoga i sisiobuyedi towafa yadi 'eba mia 'waineye,
we'e 'ifwaidi wafayega i sisivetovoidi.
7 'Ifwaidi 'Auvea i 'i'ivewekowekomidi, we'e 'ifwaidi i 'i'ive'ai'aiwabudi.
'Ifwaidi i kikiaobuyedi, we'e 'ifwaidi i kikialakaidi.
8 Tovewekowekoma 'aufofo'ualayega i sisivetovoidi,
we'e fumu'a 'ana tolaukwakwa i sisilakaidi.
I vevemiabuidi kini natunavo 'awasasadie wata
tomotoga bwaikidi matadie ma 'adi ve'ililibu.
'Auvea ma yana veimea naninidi faifaidi
fai yana kabutu'u i yatoi,
tabwaneye fwayafwaya i 'idewai.
9 Kumanidiavo 'Auvea faifaina i totokemaiga i 'i'ita'ita'iedi,
we'e tosakona i na vuyo-vagata dudubala nageneye.
Kebu tamu aitoi taunina yana toketokena 'wainega i na vetoketoke.
10 Egavo i vevetalaga 'Auvea 'waineye i na luluvela'ovidi,
yana nuasako 'ana gaviavo 'waidie 'eba kololo 'wa da vo tumuyoana butu'aina abamega.
Tomia fwayafwaya matatabudi i na vonayavuga 'Auvea mataneye.
We'e yana kini i na kiavetoketokei,
kumanina i venua'ivineniga yana toketokena i na 'i'imoso'ieni.”
11 Ana yadi lei-subisubia i 'a'avana, Elekana ma yana 'aila'a i viladi Lema yadi 'atamane, Samuela i valovei 'atamana Silo, 'Auvea faifaina i folofolova we'e tovelomu Ilai i 'i'isave'avini.
Tutuyanina Samuela i taulai i 'a'aivaita 'Auvea yana vanuga nageneye. Yaubada Samuela i awave'atumaieni wata ma 'ana ve'ililibu me Isileli matatabudi 'waidie.
We'e Ilai natunavo 'adi 'ailuga, kumanidiavo tovelomu, yadi sauluva kebu tonovidiga, bega 'Auvea tamu yana tolu'ivona i vetunei Ilai i na voneni 'awaie natunavo 'adi 'ailuga i na luvewafadi 'aiata 'aitamogana 'waineye, fai yadi sauluva sakoidi tamadi kebu i da kiavetonovediga. We'e 'awaie Ilai tubunavo matatabudi tubuvauvaudie i na veve'alawafawafa.