1 Tamu tomogo 'ana wagava Elekana i miamia Lemataimu-Sofimu, me Ifeleimi yadi fwayefwayeye 'oya siaidi 'waidie. Kumanina Dielomu natuna, Eliva tubuna, Tou aisena, we'e Sufai mata'olo'olona wauma Ifeleimi 'wainega. 2 Elekana yana vevinevo 'adi 'ailuga, Ana wata Fenina. Fenina ma natudiavo we'e Ana kakalidi.

3 Malamala 'aitamogana 'aitamogana Elekana ma yana 'aila'a i nunago 'atamana bwaikina 'ana wagava Silo, bei i 'odu'odu wata i vevelomu 'Auvea, tomia abama yadi Tovemata'ai'ai 'waineye. Tutuyanina 'waineye 'Auvea yana tovelomu 'adi 'ailuga, Ilai natunavo Ofini wata Feniasi. 4 'Aiatanidi 'waidie Elekana i vevelomu 'Auvea 'waineye, we'e 'aisaya du'udi*'Auvea yana awave'eda'eda 'Anivelena-maimaiga Veiana faifaina 'wa na 'iseni buki Veimea daba 3 wata 7. 'Ai'edi aitoi i na 'anivelena-maimaiga Veiana faifaina, 'aisayanina i na luvewafai nika tovelomu dayaga i na 'ewai 'eba velomu lilivana i na luitaitali. I na 'a'avana 'anivelenanina 'wainega tovelomu du'u 'ifwaidi i na yato'idiedi i na kabunidi 'Auvea 'waineye, mulieta toni'aisaya ma yana 'aila'avo ediavo taiadi, 'aisayanina luvegalalana i na 'ania. yana vavine Fenina ma natudiavo i veleveledi 'adi 'aisaya. 5 Avinodi 'Auvea kebu tamu kwamana Ana i da velediga, siwe Elekana i nuakalikaliedi bwaikina begaidi du'u 'atumaiotogina i veleveledi. 6 'Auvea Ana i 'ivekakalidi, tutuya matatabuna Fenina i sidibidibiedi bega i nunuavita fai kebu natudiga. 7 Malamala 'aitamogana 'aitamogana i nunago 'Auvea yana vanuga†Tutuyanina me Isileli i yaba-vuvua sali'avu'avuye, Vadavada Tabutabuna 'waineye i 'odu'odu Yaubada 'waineye, we'e nageneye Veakutagona 'ana Didiwaka i 'eno'eno. Malamala fueotogidi i 'a'ava, me Isileli tamu yadi 'eba velu'ui i yogoni 'atamana Silo 'waineye, Veakutagona 'ana Didiwaka faifaina. Bei Elekana ma yana 'aila'a i nunago i 'odu'odu wata i vevelomu 'Auvea 'waineye. We'e me Isileli yadi Vanuga 'Eba Velu'ui bwaikina Ielusalema, Solomoni bola kebu i da yogoniga. (1 Kini 6) 'waineye, bei Fenina 'adi 'aimuli i luluvulewedi begaidi ma yadi nuavita i lulumatageu wata kebu i da 'ani'ani. 8 Elekana yana vavine i velutolieni i vo, Ana, awale 'wa 'we'we'wela wata kebu 'wa da 'ani'aniga? 'Ai'edi ma natumiavo iavetadi 10 'wa da sosoana, siwe fai yau taiadi i lubwainemi 'wa da sosoana-'afo'afo.”

9 Tamu tutuya 'atamana Silo 'waineye velomu 'ana 'ani wata yemu i 'a'ava, nika Ana i tovoi i nago i velu'ui 'Auvea 'waineye. We'e tovelomu Ilai i miabui i miamia 'Auvea yana vanuga 'ana 'awa lilivaneye. 10 Ana i nuavita bwaikina, ma yadi 'we'wela i vevelu'ui. 11 Sal 6:5Ana i vona'awaufaufa 'Auvea 'waineye i vo, Ie 'Auvea, 'omu tomia abama yadi Tovemata'ai'ai we'e yau yamu tofolova. 'Ai'edi 'u da 'isanuakalikaliemaga 'ama vita 'u da 'iseni, we'e yama velu'ui 'u da nogai kwamana iavetana 'u da velema, bola 'a na vevilai 'waimuye. Kwamananina 'asa'aiana 'omu faifaimu yana mia matatabuna 'waineye, 'ana 'eba 'isa nava'auna kebu i na boboboiga.”

12 Ana i vevelu'ui 'Auvea 'waineye, Ilai i ve'wada 'awadi i 'ise'iseni. 13 Ana nuadiega i vevelu'ui, siwe i ve'awayabwayabwana kebu bonadi i da sousouyeniga. Ilai i vo 'ako ufa toketokena i yemu nuadi i lugaugauya. 14 Bega i vonedi i vo, 'Wa 'ailove! Awale ufa toketokena 'wa yemu nuami i lugaugauya?”

15 Ana i tutula i vo, Yama 'auvea, yau vavine kebu ufa toketokena 'ana toyemu, we'e mogitana yama nuanua wata yama 'anigosako 'a lulu'ivoneyeni 'Auvea 'waineye. 16 Kebu 'u na vo 'ako yau vavine tamu tosakona, we'e mogitana yama nuavita wata yama 'we'wela faifaidi 'a vevelu'ui 'Auvea 'waineye.”

17 Bega Ilai i vo, Ma yami sosoana 'wa na nago, ava'ai faifaina 'wa velu'uiga, me Isileli yada Yaubada i da velemi.”

18 Ana i vo, Kaiwa bwaikina yama 'auvea, fai 'u nuanuanima.” I veifufu'a'avana i viladi i nago i 'ani, yadi nuavita i 'a'ava.

19 I 'atai 'awa'awaiogose Elekana ma yana 'aila'a i tovoi i nagoi 'Auvea i subiai wata i 'odu 'waineye, mulieta i viladi Lema yadi 'atamane. Tutuyanina Elekana yana vavine Ana taiadi i veluaga, 'Auvea yadi velu'ui i nuanuani bega i tutuli. 20 Tutuya 'ifwaidi i 'a'avana Ana i miana mulieta i venatuna, kwamana iavetana i tubuga, i goleni Samuela. Bega i vo, Kwamananina faifaina 'a velu'ui 'Auvea 'waineye.”

21 Malamala i 'a'avana, Elekana ma yana 'aila'avo i nagoi Silo, i na 'anivelena-maimaiga wata i na velomu 'Auvea 'waineye. 22 We'e tutuyanina 'waineye Ana kebu taiadi i da nagoga, yadi lamoga i voneni i vo, Yau 'a na miamia 'ana tugusa kwamana 'a na dabai, i na 'a'ava 'a na naweni 'a na 'aniveleneni 'Auvea 'waineye. Yana mia matatabuna bei i na mia-vagata.”

23 Elekana i vo, Ava'ai 'wa voneyeniga de'e 'atumaina, bega 'wa na miamia 'ana tugusa kwamana 'wa na dabai. 'Auvea i da ivaisemi yami vona'awaufaufa 'ana mogitana 'wa na 'idewai.” Begaidi i miamia kwamana i veveuya i nagoga i dabai.

24 Tutuyanina kwamana i dabai, avinodi siaina siwe inana yadi lamoga taiadi i naweni Silo 'Auvea yana vanuga 'waineye. I nagoga side naninidi i 'ewadi i nawedi velomu faifaina. Bulumakau 'ana malamala 'aitonu, falawa venuana 'aitamogana wata oine ma ba'alina 25 Tutuyanina bulumakau i velomuyeni i 'a'avana kwamana i mieni Ilai 'waineye. 26 Ana i vo, Yama 'auvea, 'u na nuani basenadi malamalanidi i a'ava 'waidie, yau kumanima side bei lilivamuye 'a tovoi, bega 'a vevelu'ui 'Auvea 'waineye. 27 'A vevelu'uiga 'Auvea 'waineye kwamana iavetana faifaina, bega side kwamananina yama velu'ui 'ana tutula. 28 Bega 'asiau kwamana 'a mieni, 'a na 'aniveleneni 'Auvea 'waineye. Yana mia matatabuna 'Auvea i na veveimeyeni wata i na 'i'isave'avini.” I vona'a'ava Samuela i 'odu 'Auvea i subiai.