7 Me Isileli 'Auvea yana nuanua i 'i'idewadi Iosua yana tutuye, wata bani'odi 'ifwaidi to'edakumeta 'au'auveadi bola ma yawaidi i miamiani. To'edakumetanidi naninidi bwaikidi 'Auvea i 'idewadiga me Isileli faifaidi i 'isedi.

8 'Auvea yana tofolova Iosua, Nuni natuna, 'ana malamala 110 mulieta yawaina i 'a'ava. 9 Ios 19:49,50Yana 'aila'avo i ve'ufai yana fwayafwaya 'ana veuveuta Temata-sela 'waineye, me Ifeleimi yadi 'oya siaidi 'waidie, we'e 'Oya Gasi bolimana weyaginega.

10 Tutuyanina 'waineye lakata kumekumetana i wafa'a'ava, we'e tubuga 'ivauna i velamu, kumanidiavo 'Auvea kebu i da 'asetaiga wata naninidi i 'idewadiga me Isileli faifaidi i bavuyedi. 11 Me Isileli i sakosakona 'Auvea mataneye, kumaea Beli 'waidie i 'odu'odu. 12 Nika 'Auvea yadi Yaubada, kumanina tubudiavo i vagavaidi i souyedi Itifitayega, 'ana 'odu'odu i 'ailove. Ma'itufa i 'odu'odu yaubada vekavekali 'waidie, tomotoganidi lilivadie i miamiani yadi yaubadavo, 'wainega 'Auvea i 'ivenuasakoi. 13 Me Isileli 'Auvea i vedumwe'ai'aieni we'e Beli wata Asitoleta 'waidie i 'odu'odu. 14 Yadi sauluva 'wainega 'Auvea i 'ivekamogali, begaidi i 'anivelenedi to'ivesako 'waidie yadi kukua i lueloelodi, wata i tauyedi 'adi gaviavo 'waidie, kumanidiavo i miamiani lilivadie, nika kebu 'adi fata taunidi i na 'ibababaledi. 15 Tutuyanina me Isileli i nunagoi vetalaga faifaina, 'Auvea 'adi gaviavo i kikiavetoketokedi bega i leoleodi, bani'odi basenadi i vona'awaufaufa 'ana mogitana i souyeni, nika veviga wata vita bwaikina i veveluagai.

16 Bega 'Auvea toveimeavo i vevenua'ivinedi me Isileli i 'i'ita'ita'iedi tovainago wata to'ainike 'waidiega 17 Siwe me Isileli kebu yadi toveimeavo yadi vona i da noganogaidi, begaidi yadi Yaubada mogitana i 'iawelovei we'e ma'itufa taunidi i tauyedi yaubada vekavekali 'waidie i 'odu'odu. Basenadi tubudiavo i veve'ililibu 'Auvea 'waineye wata yana veimea i vevematayakeyakedi, we'e tomotoganidi de'e kebu bani'odi i da vevesauluvediga.

18 Tutuyanina 'adi gaviavo i 'i'ivekokovidi, tomotoga i taidaida 'Auvea 'waineye bonadi i noganogaidi, fai i 'isanuakalikaliedi begaidi toveimeavo i vevenua'ivinedi faifaidi. Toveimeanidi 'aitamogana 'aitamogana i labilabinidi bega bola ma yawaidie Yaubada yana tomotogavo i 'i'ita'ita'iedi 'adi gaviavo 'waidiega. 19 Siwe tutuyanina tamu toveimea yawaina i na 'a'ava, tomotoga i vilaviladi yadi sauluva tuatuaidi 'waidie. Sauluvanidi i 'i'idewadiga sakoiotogidi, we'e tubudiavo sai'afo. Yaubada vekavekali 'waidie i 'odu'odu wata yadi sauluva i vevematayakeyakedi, kebu nuanuadi yadi sauluva sakoidi i na vedumwe'ubu'ubusedi.

20 'Auvea i nuasako-'afo'afo me Isileli 'waidie bega i vo, Tomotoganidi yaku veakutagona a 'idewaiga tubudiavo 'waidie, i geuya wata yaku veimea i bailedi. 21 'Awalawanidi 'adi tomia kebu wata a na sogiedi i na souyedi, kumanidiavo Iosua i luvegalaladi mulieta i wafa. 22 'Adi gaviavonidi a na vefolovedi, nika 'wainega a na 'asetai me Isileli yaku awave'eda'eda i na vevetutuyamedi basenadi tubudiavo bani'odi.” 23 Side kumanina faifaina 'awalawanidi 'adi tomia 'Auvea i tauyedi bei i miamiani, kebu i da sogiedi wata Iosua kebu i da vetoketoke-'iawedi.