24
Malamala fuedi me Isileli i vevetalaga tomotoganidi 'awalawa Kenani bei i miamianiga taiadi. Siwe 'Auvea i 'ivaisedi matatabudi i luveyavulidi, yadi 'atamana i vilidi. Mulieta 'awalawa Kenani i vadabadabai 'adi wauma 12 'waidiamo i veuseni.
Me Isileli i vona'awaufaufa Yaubada i na vematayakeyakeni
1 Iosua me Isileli wauma matatabudi i va'augidi i maia Sekemu. I 'a'avana Iosua to'edakumeta 'au'auveadi, to'edakumeta 'ifwaidi, tovevonayavuga wata to'isave'avina i vonedi, matatabudi i maia Yaubada mataneye i tovoi.
2 Nag 11:27Bega Iosua i veifufu tomotoga 'waidie i vo, 'Auvea me Isileli yada Yaubada yana vona side i vo, Tutuya basenadi tubumiavo Tela ma natunavo Ebelamo wata Naoli i miamiani Ufa Iufiletisi vi'ainega, bei i 'odu'odu mali yaubadavo 'waidie. 3 Nag 12:1-9; Nag 21:1-3We'e yau tubumi Ebelamo a vagavaia a mieni Kenani, 'awalawanina matatabuna 'waineamo a kumeseni, mulieta natuna iavetana Aisake 'wainega tubunavo fuedi a veleni.
13 VeL 6:10,11We'e fwayafwayanina yau a velemiga kebu bei 'wa da bakubakulaga, we'e 'wa 'ani'animo, kalefa vuagina wata olive vuagina 'waidiega 'wa 'ani'ani siwe kebu 'wa da bakulidiga. Wata 'atamana bwaikidi a velemi, kebu 'wa da yogonidiga we'e 'asiau 'waidie 'wa miamiani.”
14 Wata Iosua me Isileli i vonedi i vo, Mogitana 'Auvea i 'isave'avinimi, begaidi ma yami kololo 'wa na ve'ililibuyeni, yami nuanua matatabuna 'wainega 'wa na folofolova faifaina. Basenadi tubumiavo i miamiani Ufa Iufiletisi vi'ainega wata Itifita 'waineye, yaubada fuedi 'waidie i 'odu'odu. We'e 'asiau 'wa na bailaotogedi ma'itufa 'AUVEA 'aisena 'wa na vevematayakeyakeni. 15 'Ai'edi kebu nuanuami 'wa na ve'ililibuyeniga, 'asiau taunimi 'wa na venua'ivina aitoi 'wa na vematayakeyakeni. Nuanuami yaubadavo tubumiavo basenadi 'waidie i 'odu'odu Iufiletisi vi'ainega, 'alo nuanuami me Amolaiti yadi yaubadavo, 'awalawanina 'waineye 'wa miamiani? We'e yau wata yaku 'aila'avo 'Auvea 'aisena 'a na veve'ililibuyeni wata 'a na vevematayakeyakeni.”
16 Tomotoga matatabudi i tutula i vo, 'Auvea kebu 'a na baileni bega mali yaubadavo 'waidie 'a na 'odu'odu. 17 'Auvea yama Yaubada i vagavaima, 'ima wata tamamavo 'a souyema Itifitayega basenadi bei 'a vetofolova-maimaiga. 'Eba nuavogana wata 'eba nua'ewa matameye i 'idewadi, yama mai matatabuna 'waineye i 'i'isave'avinima wata i 'ita'ita'iema 'ama gaviavo 'waidiega. 18 'Auvea kumanina me Amolaiti wata tomotoga 'ifwaidi bei i miamianiga matatabuna i luveyavulidi i souyedi. Begaidi 'ima 'Auvea 'aisena 'a na veve'ililibuyeni wata 'a na vevematayakeyakeni, fai kumanina yama Yaubada.”