5 Me Asilia yadi kini yana tolugaviavo i mai Isileli yana 'awalawa matatabuna i luvela'ovi. 'Atamana bwaikina Samelia kileuyega i bibiniga, me Asilia yadi tolugaviavo i miafifinedi malamala aitonu nagedie, nuanuadi bibina i na tuweawealidi i na luku i na leodi. 6 Tutuyanina 'waineye Kini Osia me Isileli i veveimeyedi, we'e yana veimea 'ana malamala 'ana ve-9 'waineye, Asilia 'ana kini wata yana tolugaviavo 'atamana Samelia i tala'avui nika me Isileli 'ifwaidi i 'ive'avinidi i nawedi Asilia yana 'eba veimea nageneye. Asilia 'ana kini, me Isileli 'ifwaidi i yatodi i miamiani 'atamana Ala, 'ifwaidi Kosani nageneye Ufa Aba lilivaneamo we'e 'ifwaidi me Midia yadi 'eba veimea nageneye.

7 Naninidi i souyedi me Isileli 'waidie fai i sakona 'Auvea yadi Yaubada 'waineye, kumanina i vagavaidi i souyedi Itifitayega wata Felo yana toketokena 'wainega. Yaubada mogitana i baileni ma'itufa i 'odu'odu yaubada vekavekali 'waidie. 8 Sauluva sakoidi me Isileli yadi kinivo i 'i'idewadiga i vetutuyamedi wata bani'odi mali 'awalawa 'ana tomotogavo yadi sauluva sakoidi i saladi, kumanidiavo 'Auvea i luveyavulidi yadi fwayafwaya 'waidiega me Isileli matadie. 9 Me Isileli nani sakoidi wata givagivadi i 'idewadi, naninidi 'waidiega 'Auvea yadi Yaubada i vedumwe'ai'aieni. Yadi 'eba 'odu i yogonidi yaubada vekavekali faifaidi 'atamana matatabuna 'waidie, 'atamana siaidi wata 'atamana bwaikidi, kumanidiavo kileu 'waidiega i kalififinedi. 10 1 Kin 14:23Me Isileli kileu tabutabudi i sivetovoidi wata 'ogola manamanawedi i tufedi yadi yaubada vevinena Asela faifaina, naninidi 'waidie i 'odu'odu. 'Oya 'aitamogana 'aitamogana deba'aidie wata welavi 'ai'wa'udie 'aitamogana 'aitamogana kumaeanidi i vetovoidi.

24 Asilia 'ana kini taunina yana tomotogavo i vagavaidi 'atamana Babiloni, Kuta, Ava, Amati wata Sefavani 'waidiega, i nawedi bega Samelia yana 'eba veimea nageneye i vili, me Isileli basenadi bei i miamiaga, tutulidi. Me Asilia 'awalawa Samelia i 'ewai, i miamia yadi 'atamana 'waidie. 25 Tutuyanina i vili, tomotoganidi kebu 'Auvea 'waineye i da 'odu'odu, bega 'aisaya kasikasisidi 'ana wagava laioni i vetunedi i 'iovaovadi 'ifwaidi i wafa. 26 Tomotoga vala i vetunei Asilia 'ana kini 'waineye i vo, 'Aila'anidi 'u vetunedi i nagoi Samelia yana 'atamana 'waidie, kebu 'awalawanina 'ana yaubada yana veimea i da 'asetadi wata i da vematayakeyakedi bega yaubadanina laioni i vetunedi tomotoga i 'iovaovadi wata i 'ivewafadi.”

27 Me Asilia yadi kini yana tomotogavo i vonedi i vo, Basenadi tovelomu 'ifwaidi i miamia Samelia nageneye siwe 'wa 'ive'avinidi 'wa miedi. Tamu iadi 'wa na vevilai i na nago 'atamananina 'waineye, 'odu'odu 'ana 'eda'eda i na vedi nika i na 'asetai.” 28 Bega tamu tovelomu, basenadi i 'ewaiga Samelia yana 'eba veimea 'wainega, i vilai i nago Bedeli bei i miamia, tomotoga i awave'ede'ededi nika ma yadi 'aseta 'Auvea 'waineye i na 'odu'odu.

29 Siwe tomotoganidi 'adi 'aila'a tulina tulina taunidi yadi yaubada-vekavekali i 'idewadi, 'atamananidi bei i miamianiga nagedie. Wata yadi yaubada-vekavekalinidi i yatodi me Samelia yadi 'eba 'odu'odu basenadi i 'idewadiga 'waidie.