1 Luk 4:27Nemani kumanina me Silia*'Ana mogitana vona Ibeliu 'waineye Alamu, Silia tamu 'ana wagava. yadi kini yana tovemata'ai'ai, 'Auvea i 'ivaiseni me Silia yadi tovetalaga 'adi gaviavo i vetoketoke-'iawedi begaidi yadi kini i 'asetai Nemani tomogo bwaikina ma 'ana ve'ililibu. Avinodi tovemata'ai'ainina toketokena, siwe tamu viga sakoina 'eba kololo i 'ewai tomogona 'waineye i velufo'afo'ana.

2 Basenadi 'ifwaidi tolugaviavo Silia 'wainega i nago me Isileli taiadi i vetalaga, bei tamu vavine Isileli ne'e'elina i 'ive'avini i mieni i vetofolova Nemani yana vavine faifaidi. 3 Tamu tutuya vavinenina Nemani yana vavine i vonedi i vo, Nuanuaku 'aku toveimea i da nago Samelia, Yaubada yana tolu'ivona 'waineye bega 'ana viga i da 'ive'atumaia.”

9 Bega Nemani wata yana tofolovavo i dodoga yadi salioti†Salioti tamu fwayafwaya 'ana waka, 'aisaya osi i luluyo'ei. tabwadie nika osi i yo'edi i nagoi 'awalawa Samelia. Tutuyanina i le'wa, i nago i tovoi Ilaisa yana vanuga 'ana 'awa 'waineye. 10 Ilaisa yana vala 'ana to'ewa i vetunei Nemani i voneni i vo, 'U na nago Ufa Iolidani 'waineye 'u na luluva tutuya 7, mulieta tomogomu 'ana 'isa i na ve'atumai.”

11 Nemani i nuasako-'afo'afo nika i yogovonavona i vo, A nuanua i da mai 'waikuye, faifaiku 'Auvea yana Yaubada 'waineye i da velu'ui bega i da luiwagiku nika a da ve'atumai. 12 Yaku 'atamana Damasiko nageneye ufanidi 'adi 'ailuga Abana wata Fafa, kumanidiavo 'atumaiotogidi we'e Isileli yana 'eba veimea nageneye ufanidi kebu 'eba toa 'atumaidiga. I lubwaineni a da nago Damasiko ufanidi 'waidie a da toa, nika a da ve'atumai.” Bega ma yana nuasako i vilai i nago.

13 Siwe Nemani yana tofolovavo i maia 'waineye i vo, 'Ama toveimea, 'ai'edi 'Auvea yana tolu'ivona i da vonemu tamu nani vitana 'u da 'idewai bega 'u da ve'atumai, naninina 'u da 'idewai. Siwe i vonemu nani safailina 'u na 'idewai, i lubwaineni 'u da 'idewaimo. I vo, 'U nago 'u toa,’ bega 'u da toaga, nika 'u da ve'atumai.” 14 Nika Nemani i nago Iolidani ufeye i luluva tutuya 7 bani'odi Yaubada yana tofolova i voneni. I luluva'a'ava nika Nemani tomogona matatabuna i vevunavunaga 'u da vo kwamana siaina vovona bani'odi.

15 Nemani yana tofolovavo taiadi i viladi i nagoi Yaubada yana tolu'ivona Ilaisa 'waineye, i voneni i vo, Be'ama a 'aseta-'atumaia fwayafwaya matatabuna 'waineye kebu tamu Yaubada i da miamia, 'omi me Isileli 'aiseotogimi ma yami Yaubada. We'e yau, yamu tofolova, bega a vevelu'ui 'waimuye, yaku nuakalikali 'u da 'ewai.”

16 Siwe Ilaisa i vo, 'Auvea miamia-vagaina, faifaina a vetofolova, 'ana wagavayega a vona mogitana, kebu tamu sai'afo yamu nuakalikali a na 'ewai.” Nemani i kwayega-'afo'afo nuanuana Ilaisa yana nuakalikali i na 'ewai, siwe Ilaisa i baila.

17 Nemani i vo, 'Atumaina, siwe a vevelu'ui 'waimuye, 'ai'edi 'u da sosoana, Isileli yami fwayafwaya‡Nemani i vo 'ako me Isileli yadi fwayafwaya tabutabuna bega Yaubada nuanuana tomotoga i na 'odu'odu fwayafwayanina 'waineye. Nemani nuanuana fwayafwaya Isileli 'wainega i na naweni yana 'awalaweye bega 'eba velomu i na 'idewai tabwaneye, bei i na 'odu'odu 'Auvea 'waineye. 'ifwaidi 'u da veleku a da 'ewai, ma venuanidi a da dodogidi 'aisaya doniki 'ailuga kwavudie. A da 'ewadiga fai 'asiau bega i na nagoga a na 'a'anivelena-maimaiga wata 'aisaya a na vevelomuyedi a na kabukabunidi 'Auvea 'aisena 'waineye. 18 Yau yamu tofolova, nuanuaku yamu 'Auvea yaku sakona 'aitamogana i da nuatavuni. Tutuyanina yaku to'edakumeta bwaikina i na lukuluku yana yaubada Limoni yana vanuga 'eba 'odu'odu 'waineye, nimakuye i na 'abi'abi bega tutuyanina i na 'odu'odu, yau i na 'i'iveuneuneku taiadi 'a na 'odu'odu. Naninina faifaina 'Auvea i da nuatavuniku.”

19 Nika Ilaisa Nemani i voneni i vo, Ma yamu sosoana 'u na nago,” bega Nemani i tauya i nago.