8 Tamu 'aiata 'waineye Ilaisa i nago 'atamana Sunemu 'waineye, bei vavine 'ai'aiwabudi i miamia. I tayegi i mai yadi vanuge taiadi i 'ani. We'e 'awaie, 'ai'edi beidimo Ilaisa i na mimai, bei i na lukuluku i na veveawai wata i na 'ani'ani. 9 Yadi lamoga i voneni i vo, Tomogo de'e be'ama 'a 'asetai, kumanina tamu Yaubada yana tofolova vevenua'ivinina i mimai 'waideye. 10 Bega i lubwaineda tamu tutudaba siaina ta da 'idewai faifaina, yada vanuga tabwana bababana 'waineye. Yana 'eba 'eno, yana talalia, yana 'eba tunuvala wata yana mageta ta na yatodi tutudabanina nageneye bega i na mimaiga, bei i na veveawai.”

11 Tamu 'aiata 'waineye Ilaisa i mai 'atamana Sunemu, i laka yana tutudabeye i na veawai. 14 Ilaisa yana tofolova Geasi i velutolieni i vo, Ava'ai tamu nani 'atumaina a da 'idewai vavine de'e faifaidi?”

Geasi i vo, Vavine de'e kebu natudiga we'e yadi lamoga 'akonadi i ve'auvea.”

15 Ilaisa Geasi i voneni i vo, Vavine 'u na vonedi i na mai.” Bega Geasi vavine i vonedi i mai i tovoi tutudaba 'ana 'awa 'waineye. 16 Nag 18:14Nika Ilaisa vavine i vonedi i vo, Malamala 'aitamogana i na 'a'ava kwamana 'wa na 'aleameni.”

Vavine i veifufu Ilaisa 'waineye i vo, Kebu, yama 'auvea, 'omu Yaubada yana tofolova, kebu 'u na vekaliemaga.”

17 Siwe tutuya 'ifwaidi i 'a'ava nika vavine i miana, mulieta sino malamalanina 'waineye natudi iavetana i tubuga, bani'odi Ilaisa i voneyediga 'ana mogitana i souyeni 'waidie.

42 Tamu 'aiata 'waineye tamu tomogo i mai 'atamana Beli-Salisai 'wainega beledi 'adi 20 Ilaisa i veleni, beledinidi i kabunidiga yadi 'ayavau bali*Bali tamu mosomoso biladi witi 'ana 'isa'isa bani'odi, i na tutuya bega falawa i na 'ewai beledi 'ana 'anikabu faifaina 'wainega, wata bali yauyauvina ma galagalana i veleni. Ilaisa 'ani'aninidi i 'ewadi yana tofolova i voneni i vo, Tomotoga 'u na veledi i na 'ani.”

43 Siwe Ilaisa yana tofolova i vo, 'U da 'asetai, 'ana fata de'e 'ani'ani siaina 'wainega tomotoga 'adi 100 a na ve'anidi?”

Ilaisa i tutuli i vo, 'Auvea i vonaga matatabudi i na 'ani we'e luvegalalana i na 'eno'eno 'adi 'ibua. Begaidi tomotoga 'u na veledi i na 'ani.”

44 Bega tofolovanina 'ani'ani tomotoga i veledi i ve'ala'ani. Matatabudi 'adi fata, we'e 'ani'ani 'ifwaidi iluvegalaladi bani'odi 'Auvea i voneyedi.