2 Kini
'Eba kiavemageta
1 Kini wata 2 Kini nagedie i veveifufu ava'ai naninidi i souyedi Kini Devida yana tutuya mulineye. 1 Kini 'waineye ta 'iseni Solomoni bani'odi i munega tamana Devida 'ana 'ivi i 'ewai bega i vekini. We'e 2 Kini 'waineye ta na 'iseni i veveifufu me Iuda wata me Isileli faifaidi.
Tutuyanina Solomoni yawaina i 'a'ava, me Isileli i 'idi, 'eba veimea 'ailuga i souyedi, tamu bolimana weyaginega i goleni Iuda we'e tamu i goleni Isileli.
Tutuyanina me Iuda yadi kini wata me Isileli yadi kini 'Auvea i veve'ililibuyeni tomotoga yadi mia i ve'atumai, vetalaga kebu. We'e tutuya 'ifwaidi 'waidie kininidi i yogosako yadi Yaubada mataneye kebu i da ve'ililibuyeni, we'e ma'itufa i 'odu'odu yaubada-vekavekali 'waidie, nika 'wainega nani sakoidi i sousouyedi. We'e tutuyanina me Isileli Yaubada 'ana ve'ililibu i 'ailove, bei Yaubada yana vona 'ana tolu'ivonavo i vetunedi i na 'edakumesedi.
2 Kini nageneye, ta na 'iseni tamu tolu'ivona bwaikina 'ana wagava Ilaisa 'eba nua'ewa wata 'eba nuavogana i 'idewadi 'Auvea yana 'aivaita 'wainega. Wata tutuyanina 'waineye tomotoga i vonedi bega i na vila-vaituganidi yadi Yaubada mogitana 'waineye.
Tutuyanina Ilaisa yawaina i 'a'ava, kini fuedi yadi sauluva i sako-'afo'afo begaidi Yaubada yana tomotogavo i vematavulogidi. Me Asilia i tauyedi bega i mai me Isileli i vetoketoke-'iawedi nika i yogonidi i nawedi taunidi yadi 'awalaweye.
Malamala 'ifwaidi i 'a'ava, Kini Nebukadinesa ma yana tolugaviavo i nago Ielusalema i tala'avui wata me Iuda fuedi i 'ive'avinidi i nawedi Babiloni. Bei i miamia malamala 70 nagedie mulieta Yaubada i tauyedi me Iuda fuedi i viladi taunidi yadi 'awalaweye.
2 Kini 'ana 'idi
'Eba veimeanidi 'adi 'ailuga, Isileli wata Iuda 1:1-17:41
Yaubada yana tolu'ivona Ilaisa ifuifufuna 1:1-13:20
Me Iuda yadi kinivo wata me Isileli yadi kinivo ifuifufudi 8:16-17:4
Me Asilia yadi kini 'awalawa Samelia i tala'avuidi wata Isileli yana 'eba veimea matatabuna 17:5-41
Me Iuda yadi kinivo ifuifufudi 18:1-25:30
Kini Esekaia 'wainega i velamu i nagoga 'ana tugusa Kini Iosia yana tutuya 'waineye 18:1-21:26
Me Iuda yadi kinivo 'eba ve'a'ava ifuifufudi 23:31-24:20
Me Babiloni yadi kini 'atamana Ielusalema i tala'avui wata me Iuda yana 'eba veimea i luvela'ovidi. 25:1-30
2
'Auvea Ilaitia i vagavaia i lakaveni abame
1 'Auvea sai'afoga Ilaitia i na vagavaia i na lakaveni abame kaukau luluvivilina 'wainega, Ilaitia wata Ilaisa i tauya Giligali wainega i nunagoi. 2 Ilaitia Ilaisa i voneni i vo, 'Omu side bei 'u na miamia, yau 'Auvea i voneku a na nago Bedeli.” Siwe Ilaisa i vona i vo, 'Auvea miamia-vagaina wata 'omu ma yawaimu 'u miamia, wata bani'odi a vona'awaufaufa kebu tamu sai'afo a na bailemuga.” I vona'a'ava nika i tauya i nago Bedeli.
3 Bedeli nageneye Yaubada yana vona 'ana tolu'ivonavo ma 'aila'adi i maia Ilaisa i velutolieni i vo, 'Omu yamu to'edakumeta 'ako 'Auvea i na vagavaia 'waimuyega, 'u 'asetai?”
Ilaisa i tutula i vo, E'e a 'asetai, siwe kebu faifaina 'wa na veifufu.”
4 Ilaitia Ilaisa i voneni i vo, 'Omu side bei 'u na miamia, yau 'Auvea i voneku a na nago 'atamana Ieliko.” Siwe wata i tutula i vo, 'Auvea miamia-vagaina wata 'omu ma yawaimu 'u miamia, wata bani'odi a vona'awaufaufa kebu tamu sai'afo a na bailemuga.” I vona'a'ava nika i tauya i nago Ieliko.
5 'Atamana Ieliko bei 'Auvea yana vona 'ana tolu'ivonavo ma 'aila'adi i miamiani nika Ilaisa i le'wa i velutolieni i vo, 'Omu yamu to'edakumeta 'ako 'Auvea i na vagavaia 'waimuyega, 'u 'asetai?”
Ilaisa i tutula i vo, E'e a 'asetai, we'e kebu faifaina 'wa na veifufu.”
6 Ilaitia Ilaisa i voneni i vo, 'Omu side bei 'u na miamia, yau 'Auvea i voneku a na nago Ufa Iolidani.” Siwe i tutula i vo, 'Auvea miamia-vagaina wata 'omu ma yawaimu 'u miamia, wata bani'odi a vona'awaufaufa kebu tamu sai'afo a na bailemuga.” I vona'a'ava nika i tauya taiadi i nago.
7 Yadi nagonina 'waineye, 'Auvea yana vona 'ana tolu'ivonavo 'adi 'aila'a 50 taiadi i nagoi. Tutuyanina Ilaitia wata Ilaisa i le'wa Ufa Iolidani 'waineye bei i 'ailove, we'e tolu'ivonanidi 'ani'ieyega i tovotovoi i vemata'i'i'iedi. 8 Ilaitia 'ana talauma i ta'ia i 'a'avana i nunumi, 'wainega ufa i nikei i 'awa'idia nika 'adi 'ailuga fwayafwaya lalaneamo i damana.
9 VeL 21:17Tutuyanina i le'wa tamu vi'ai 'waineye Ilaitia Ilaisa i voneni i vo, 'Ai'edi ava'ai yamu nuanua 'u na voneku, bega faifaimu a na 'idewai, mulieta 'Auvea 'waimuyega i na vagavaiku.”
I tutula i vo, A velu'ui-nuakalikali 'waimuye, nuanuaku yamu toketokena ma 'ana 'imoso'i 'u da veleku bega 'amu 'ivi a da 'ewai a da vetolu'ivona 'Auvea faifaina.”
10 Ilaitia i tutula i vo, Naninina faifaina 'u velu'uiga vitana 'waikuye. 'Ai'edi 'u na 'iseku 'Auvea 'waimuyega i na vagavaikuga, bei yamu velu'ui 'ana tutula 'u na veluagai. 'Ai'edi kebu, wata kebu.”
11 'Adi 'ailuga i veveifufu'eda'eda nika 'aisaya osi 'ala'alaidi wata salioti*Salioti tamu fwayafwaya 'ana waka, 'aisaya osi i luluyo'ei. 'ala'alaina i souyedi Ilaitia wata Ilaisa kamwadie, nika 'Auvea Ilaitia kaukau luluvivilina 'wainega i vagavaia i lakaveni abame. 12 2 Kin 13:14Tutuyanina Ilaisa i 'iseni bonana bwaikinega i vegole i vo, Tamaku, tamaku. Me Isileli yada salioti wata 'ana tododogavo a 'ise'isedi.” We'e kebu 'ana fata Ilaitia i na 'isa-vaitugani. Ilaisa ma yana nuavita 'ana talauma i ta'ia bega i silabu'alugedi.
13 Tutuyanina 'Auvea Ilaitia i vagavaia i lakalakaveni 'ana talauma i ve'anita'ia i obu fwayefwayeye, Ilaisa i 'ewai bega i vilai i nago Ufa Iolidani lilivaneye i tovoi. 14 Bega talaumanina Ilaitia i ve'anita'ia i 'ewai, 'wainega ufa i nikei i ta'ala i vo, Ilaitia yana 'Auvea, 'omu ava'aibe bei?” Tutuyanina ufa i nikei i 'awa'idia nika Ilaisa i damana.
15 'Ani'ieyega 'Auvea yana tolu'ivonavo Ieliko 'wainega i 'isanaweni ava'ai i souyeniga, fuedi i vona i vo, Ilaitia yana toketokena i damana Ilaisa 'waineye,” bega fuedi i nagoi ma yadi ve'ililibu i 'odu 'waineye. 16 Fuedi i vona i vo, De'e bei ta miamiaga tomotoga toketokedi 'adi 'aila'a 50, 'ana fata 'u da tauyedi i da nago yamu to'edakumeta i da lualeni? Voke 'Auvea 'Anu'anununa i vagavaia i naweni 'oya deba'aineye i siobuyeni 'alo tamu 'awakovana 'waineye.”
Ilaisa i tutula i vo, Kebu 'wa na nagoiga.”
17 Siwe i toke i lulukakadeni nika i 'ivebunumayagi bega i vonedi i vo, 'Atumaina, 'wa nagoi.” Iaveta 'adi 50 i nagoi Ilaitia i lualeni 'aiata aitonu nagedie siwe kebu i da veluagai. 18 Ilaisa 'atamana Ieliko bei i miamia, bega tutuyanina tolaualanidi i viladi i vonedi i vo, Bagase a vonemi a vo, Kebu 'wa na nagoga,’ fai kebu 'ami fata 'wa na veluagai.”