1 Tutuyanina Eabi i le'wa yana 'atamane i veifufu yana vavine Iesibeli 'waidie ava'ai Ilaitia i 'idewadiga wata bani'odi i munega Beli yana tolu'ivonavo i luvewafadiga faifaidi. 2 Bega Iesibeli vala i vetunei Ilaitia 'waineye i voneni i vo, 'Awa'awai side inalanina 'a na wai 'a na nikemu, bani'odi Beli yana tolu'ivonavo 'u leodi. We'e 'ai'edi kebu 'a na 'idewadiga, yama yaubadavo i da toke i da nikema wata i da luvewafama.”

3 Valanina Ilaitia i nogai i kololo-'afo'afo, nuanuana taunina i na 'ita'ita'ieni, i tovoi i dega. Tutuyanina i le'wa Bedisiba, Iuda yana 'eba veimea nageneye, yana tofolova i valovei. 4 Ioa 4:3We'e 'aise'avana i nago i luku sali'avu'avuye. 'Awasasanina 'waineye i nunagoga manamanaweotogina bani'odi 'aiata 'aitamogana 'ana vemanawe. Tutuyanina i le'wa tamu welavi siaina 'ana wagava Divudivu 'waineye,*Welavinina yayu 'ana 'isa'isa lamuneye i miabui. I 'abiawa-'afo'afo nuanuana i da wafa bega i velu'ui 'Auvea 'waineye i vo, 'Akonadi 'aku fata, de'e vebaenina 'waikuye vitaotogina, yawaiku 'u da 'ewai. De'e 'aku 'isa 'u da vo 'akonadi a da wafa basenadi tubukwavo bani'odi.” 5 I 'ufobala welavinina lamuneye nika i 'eno-mataiva.

I 'eno'eno nika anelose i souyeni i luvagoni i vo, 'U tovoi 'u na 'ani.”

6 I 'enovilai i 'isadaba nika lilivaneye i 'isedi beledi i kabukabuni mula'wa tabwaneye wata ufa ma ba'alina. I 'ewadi i 'ani, i 'a'avana wata i 'ufobala-vaitugana.

7 Wata 'Auvea yana anelose i vila-vaitugani i luvagoni i vo, 'U tovoi 'u na 'ani. 'Ai'edi kebu 'u na 'aniga, 'edeye 'u na mwea.” 8 I tovoi i 'ani wata i yemu, nika i vetoketoke bega i tauya i nunago 'aiata 40 wata lovana 40 mulieta i le'wa 'Oya Sainai, tamu 'ana wagava Yaubada yana 'Oya. 9 Fai i lovani bega i nago i luku ovu nageneye i 'eno.

Nika 'Auvea Ilaitia i voneni i vo, Ilaitia, ava'ai faifaina 'omu 'u mai de'e bei?”

10 Lom 11:3I tutula i vo, 'Auvea, 'omu Yaubada tomia abama yadi Tovemata'ai'ai, tutuya matatabuna 'aisemu faifaimu a toke a folofolova we'e me Isileli yamu veakutagona i vedumwe'ai'aieni wata yamu 'eba velomu i geuya, we'e yamu vona 'ana tolu'ivonavo i luvewafadi. Yau 'aiseotogiku i luvegalalaku, i vevenua'ivina nuanuadi yau wata i na luvewafaku.”

11 'Auvea i vo, 'U souyemu bega 'u na tovoi matakuye 'oya deba'aineye.” Bei Ilaitia i tovotovoi, 'Auvea lilivaneamo i nago nika kaukau toketokena 'oya i yuei kileu i sifuafuadi, taitaina 'oya i taini siwe 'Auvea kebu kaukau nageneye i da miamiaga. Nika kaukau nunuga i 'ailove we'e yoyoyo i velamu i yueyue siwe 'Auvea kebu yoyoyo nageneye i da miamiaga.

12 Yoyoyo i 'a'avana, nika 'ai 'ala'alata i velamu siwe 'Auvea kebu nageneye i da miamiaga. 'Ai 'ala'alata i 'ailove nika bei ve'awayaya i nogai. 13 Tutuyanina Ilaitia i nogai 'ana talauma i 'ewai bega maigina i velu'uvai†'Ai'edi tomotoga Yaubada i na 'iseni i na ve'alawafawafa. bega i nago i tovoi ovu 'awaneye.

Nika bona i nogai i vo, Ilaitia, ava'ai faifaina 'u mai?”

14 Ilaitia i tutula i vo, 'Auvea, 'omu Yaubada tomia abama yadi Tovemata'ai'ai, tutuya matatabuna 'aisemu faifaimu a toke a folofolova we'e me Isileli yamu veakutagona i vedumwe'ai'aieni wata yamu 'eba velomu i geuya, we'e yamu vona 'ana tolu'ivonavo i luvewafadi. Yau 'aiseotogiku i luvegalalaku, i vevenua'ivina nuanuadi yau wata i na luvewafaku.”

15 2 Kin 8:7-13Nika 'Auvea i voneni i vo, 'U na vilamu 'edanina 'waineamo 'u maiga wata 'waineamo 'u na nago, nika Damasiko sali'avu'avuye 'u na le'wa. Tutuyanina 'u na le'wa bei 'u na luku 'atamana bwaikina nageneye, bunama 'u na 'ewai Esale 'u na iwagi, vekini 'ana tugusa me Silia faifaidi. 16 2 Kin 9:1-6Wata Nimisi natuna Dieu 'u na iwagi, vekini 'ana tugusa me Isileli faifaidi, wata Safata natuna Ilaisa 'atamana Ebeli-Mikolai 'wainega 'u na iwagi, 'eba 'isa tutulimu, i na vetolu'ivona faifaiku 17 'Ai'edi tamu aitoi i na dega Esale 'wainega, Dieu i na luvewafai, we'e egavo i na dega Dieu 'wainega, Ilaisa i na luvewafadi. 18 Lom 11:4We'e me Isileli nagedie tomotoga 'adi 7,000 kebu tamu tutuya i da 'odu Beli 'waineye wata ma yadi ve'ililibu kumaea i da yaogi, kumanidiavo a tauyedi i na miamiani.”

19 Bega Ilaitia i nago Safata natuna Ilaisa i veluagai bakule. Bei tomotoga 12 i luluvuavuana, tomotoganidi 'aitamogana 'aitamogana bulumakau 'ailuga 'waidiega i luluvuavuana,‡Me Isileli bulumakau 'adi 'ailuga i sifwasedi 'waidiega 'eba 'aiala i luluyo'ei bega yadi bakula i luvuavuana. we'e tamu 'waidiega taunina Ilaisa, mulidie i luvuavuana. Ilaitia 'ana talauma i ta'ia, i nago Ilaisa i veagei, nika i tauya. 20 Ilaisa yana bulumakau wata yana 'eba luvuavuana i yatodi, Ilaitia mulineye i lilide i nago. I vo, Nagami 'u na tauyeku a na nago tamaku wata inaku a na 'alanuaidi, mulieta a na mai taiadi ta na nago.”

Ilaitia i tutula i vo, 'U na nago, we'e naninina a 'idewai 'waimuye kebu nuamu i na fani 'u na nuanuani.”

21 Nika Ilaisa i vilai i nago, bulumakaunidi 'waidiega i luvuavuanaga i nikedi i wafa, we'e 'eba 'aiala i tufuafuadi 'ai i levai 'aisaya i kabunidi, bega tomotoga i veledi i 'ani. I 'ani'a'ava nika Ilaitia mulineye i nago 'ana to'aivaita.