1-2 Tutuya manamanawena 'wei kebu i da 'wei'weiga Samelia yana 'eba veimea matatabuna nageneye, wata tutuyanina 'waineye 'ani'ani kebu. Loka bwaikina malamala 'ana vetonu 'waineye 'Auvea Ilaitia i voneni i vo, 'U na nago Kini Eabi 'waineye taiadi 'wa na veifufu. Sai'afoga yau a na ve'wei fwayafwaya matatabuna 'waineye.” Bega Ilaitia 'Auvea yana vona i nogai, i tauya i nago Kini Eabi taiadi i veluaga.

17 Tutuyanina Kini Eabi Ilaitia i 'iseni i voneni i vo, De'e 'alo 'omu, kumanimu nani sakoidi wata vitadi 'u lukuvedima Isileli nageneye.”

18 Ilaitia i tutula i vo, Yau kebu tamu nani sakoina a da lukuvedima Isileli nageneye, we'e mogitana 'omu wata tamamu yana 'aila'a taiadi 'wa vekali, fai 'Auvea 'wa vedumwe'ai'aieni wata yana veimea 'wa geuya, 'wa 'odu'odu kumaea Beli 'waineye. 19 'Atumaina, 'asiau me Isileli matatabudi 'u na goledi i na maia taiadi ta na veluaga 'Oya Kamela 'waineye. Beli yana vona 'ana tolu'ivonavo 450 wata Asela yana vona 'ana tolu'ivonavo 400, kumanidiavo Kwini Iesibeli i veve'anidi, matatabudi i na maia.”

20 Bega Eabi yana veimea 'wainega me Isileli matatabudi wata tolu'ivonanidi taiadi i va'auta 'Oya Kamela 'waineye. 21 Ilaitia 'aila'a matadie i tovoi i vonedi i vo, I lubwainemi venuanaluga 'wa na 'ailove. 'Ai'edi yami nuanua 'wa na vo, 'Auvea vona mogitana yama Yaubada,’ 'wa na ve'ililibuyeni, we'e 'ai'edi 'wa na vo, Beli kumanina yama yaubada,’ wata 'wa na ve'ililibuyeni.”

Matatabudi i ve'wada, kebu tamu aitoi i da vona.

22 Bega Ilaitia tomotoga i vonedi i vo, Yau 'aiseotogiku 'Auvea yana tolu'ivona, we'e Beli yana tolu'ivonavo fuedi 'adi 'aila'a 450. 23 Bulumakau iavetadi 'adi 'ailuga 'wa na miedi ta na vefolovedi. Beli yana tolu'ivonavo tamu i na venua'ivineni taunidi faifaidi, i na 'ewai i na luvewafai i na 'a'avana i na 'iboboboi mulieta 'ai tabwadie i na yatodi yadi 'eba velomu 'waineye, siwe kebu 'ai 'wainega i na tunuya. Bani'odi i na 'idewadiga yau wata bani'odi a na 'idewai, tamu bulumakau a na 'iboboboi mulieta 'ai tabwadie a na yatodi siwe 'ai kebu a na tunuyaga. 24 Nuanuaku 'omi Beli yana tolu'ivonavo 'wa na velu'ui yami yaubada 'waineye we'e yau a na velu'ui yaku 'Auvea 'waineye. Ava'ai 'aila'aga yadi Yaubada velu'ui i na tutuli 'ai 'ala'alata 'wainega, ta na 'asetai kumanina mogitana Yaubada, ta na 'odu'odu 'waineye.”

Bega tomotoga matatabudi i vona i vo, Ava'ai 'u voneyeniga, vona mogitana.”

25 Wata Ilaitia Beli yana tolu'ivonavo i vonedi i vo, 'Omi fai 'aila'a begaidi 'wa na kumeta 'wa na velomu. Tamu bulumakau 'wa na venua'ivineni faifaimi 'wa na velomuyeni siwe kebu 'wa na tunuya, nagami 'wa na velu'ui yami yaubada 'waineye.” 26 Tamu bulumakau i 'ewai i 'iboboboi bega i vedodogi 'eba velomu tabwaneye. Nika 'awa'awaiogose velu'ui i velamu Beli 'waineye i nagoga 'ana tugusa i veutukamwani. I toke i vegolegole i vo, Beli, yama velu'ui 'u da nogai.” Siwe kebu tamu yadi velu'ui 'ana tugusa i da souyeni, nika i velamu i suyasuya 'eba velomu i luluvivili.

27 'Aiata 'ana utukamwana 'waineye Ilaitia i velamu i sidibidibiedi i vo, 'Wa na toke 'wa na velu'ui! De'e yami yaubada! Voke i toke i vevenua'ivina 'alo i nago yana wala'aie. Wata voke i nago i yabayaba 'alo i 'eno'eno 'wa na luvagoni.” 28 Bega i toke i vegolegole bonadi bwaikinega, nika taunidi naifi 'waidiega i 'i'italatalagidi wata i 'ilovelovenidi yadi 'odu'odu 'ana sauluva bani'odi, 'ana tugusa dayaga i ilolo. 29 I toke-'afo'afo i vegolegole, siwe i vegole-wayoga nika i lavia velomu 'ana tutuya 'waineye i le'wa. Kebu tamu vona i da nogaiga wata yadi velu'ui 'ana tutula kebu i da veluagai.

30 Ilaitia tomotoga i goledi i vo, 'Wa maia 'waikuye,” nika matatabudi i nagoi Ilaitia lilivaneye, bega 'Auvea yana 'eba velomu, tomotoga i geuyaga, i didiga-vaitugani. 31 Nag 32:28; 35:10Side bani'odi Ilaitia i 'idewai. Kileu 12 i 'ewadi, Iakobo natunavo 'adi wauma 'aitamogana 'aitamogana 'ana 'eba nuave'avina faifaina. We'e basenadiotoga 'Auvea Iakobo i voneni i vo, 'Amu wagava 'ivauna a na golemu Isileli.” 32 Side kileunidi 'waidiega 'Auvea yana 'eba velomu i didigi, we'e 'eba velomu lilivaneamo ovu i alavivivili 'ana fata ufa 14 lita 'ana 'etowava bani'odi.*'Ana mogitana vona Ibeliu 'waineye, Sia 'ailuga, dalamu siaina 'aitamogana 'ana 'etowava bani'odi. 33 Nika 'ai i liai 'eba velomu tabwaneye, bulumakau i 'ibobobodi siaina siaina i vedodogidi 'ai i iliaiga tabwaneye. Bega i vo, Dalamu siaidi 'adi 4 ma ufadi 'wa na 'ewadi 'wa na iwagidi 'aisaya wata 'ai tabwadie.”

34 I iwagi i 'a'ava wata i vonedi i vo, 'Wa na luvaitugani.” I iwagi i 'a'avana wata i vo, Tutuya 'ana vetonu 'wa na iwagi.” Nika ava'ai i voneyeniga bani'odi i 'idewai. 35 Bega ufa 'eba velomu 'wainega i iwaga, i obu ovu i alaviviviliga i luveadagi.

36 'Akonadi i lavia velomu 'ana tutuya i le'wa, Yaubada yana tolu'ivona Ilaitia i nago 'eba velomu lilivaneye i tovoi i velu'ui i vo, 'Auvea, 'omu Ebelamo, Aisake wata Isileli†Tubudinina Isileli, tamu 'ana wagava Iakobo yadi Yaubada, tutuya de'e 'waineye 'u na vema mogitana 'omu me Isileli yama Yaubada, we'e yau yamu tofolova bega nani matatabuna a 'idewadiga yamu veimea 'wainega i souyedi. 37 Yaku velu'ui 'u da nogai nika 'wainega de'e tomotoganidi i na 'asetamu 'omu 'Auvea mogitana Yaubada, wata yadi nuanua 'akonadi 'u siviladi bega taunidi i na tauyedi 'waimuye.”

38 Nika 'Auvea 'ai 'ala'alata i vetunei abamega i obuma, bulumakau natudi i 'alai, welavi, kileu, fwayafwaya wata ufa i 'alavelavelalai 'eba velomu lilivaneye.

39 Tutuyanina tomotoga i 'iseni, matatabudi i lumata'afufu fwayefwayeye i vo, 'Auvea, 'omu 'asa'aiana Yaubada, 'Auvea, 'omu 'asa'aiana Yaubada.”

40 Nika Ilaitia i veimeyedi i vo, Beli yana vona 'ana tolu'ivonavo matatabuna 'wa na 'ive'avinidi. Kebu tamu aitoi i na dega.” Bega matatabudi i 'ive'avinidi, Ilaitia i nawedi i obu 'Awakova Kisoni bei i luvewafadi.

41 Nika Ilaitia Kini Eabi i voneni i vo, 'U nago 'u na 'ani wata ufa 'u na yemu fai 'wei bwaikina butu'aina a nogai i mimai.” 42 Iem 5:18Nika Eabi i nago i 'ani wata i yemu, we'e Ilaitia 'Oya Kamela deba'aineye i laka bei i 'odu fwayefwayeye, 'unu'ununa i obu 'agena 'awasasadiamo bega i velu'ui.

43 Yana tofolova i voneni i vo, 'U na nago bega 'u na 'isanago malaveta weyaginega.” Yana tofolova i nago i 'isanago wata i vilai i mai Ilaitia i voneni i vo, Kebu tamu tugusa a da 'iseniga.” Tutuya 'adi 7 Ilaitia i voneni i nago i 'isanago.

44 Yana nago 'ana ve-7 'waineye, i vilai i mai Ilaitia i voneni i vo, Waowa siaina a 'iseni malavetayega i lakalakama, tomogo nimayafayafana 'ana 'isa'isa bani'odi.” Nika Ilaitia i vo, 'U na nago Eabi 'u na voneni 'u na vo, Yamu salioti‡Salioti tamu fwayafwaya 'ana waka, 'aisaya osi i luluyo'ei. 'waineye 'u na dodoga 'u na vilamu yamu 'atamane mulieta 'wei i na 'wei, i na nunago i na lubodemu.”

45 Kebu tutuya manamanawenaga abama matatabuna i bweuya waowa 'wau'waugaotogina 'wainega i umai, kaukau i velamu i nununuga 'wei bwaikaotogina i obu. Eabi i laka salioti 'waineye nika i tauya matayo'o i nunago 'atamana Deseli. 46 Bega 'Auvea Ilaitia i kiavetoketokei, 'ana kaleko i silakai i tufeni 'ana wa'ila 'waineye, nika i lilide i kumeta, we'e Eabi ma yana salioti i 'edafeleni i nagoga 'ana tugusa Deseli i le'wa.