1 Iem 5:17Tutuya 'ifwaidi i 'a'ava, Yaubada yana vona 'ana tolu'ivona Ilaitia, yana 'atamana 'ana wagava Tisiba, 'awalawa Giliadi nageneye, i nago Kini Eabi i voneni i vo, 'Auvea me Isileli yama Yaubada miamia-vagaina, we'e yau yana tofolova, begaidi a vona mogitana 'waimuye, 'wei kebu i na 'wei'weiga*Me Kenani yadi nuanua i vo 'ako Beli i veve'wei, siwe Ilaitia i na sivemageseni 'Auvea 'aiseotogina tove'wei. wata kebu numula 'awalawa de'e i na 'ivebikadi malamala i mimaiga 'waidie 'ana tugusa a na vona nika 'wei bei i na 'wei.”

8 Tutuya 'ifwaidi i 'a'ava 'Auvea Ilaitia i voneni i vo, 9 Luk 4:25,26'U na nago 'atamana Salefati, 'awalawa Saidoni nageneye bei 'u na miamia, 'akonadi tamu vavine 'wabu'wabulidi a vonedi i na 'i'isave'avinimu.”

10 Begaidi Ilaitia i nago Salefati, nika 'atamananina 'ana 'awa 'waineye i le'wa, vavine i 'isedi 'ai i 'a'ai'ewa i vonedi i vo, Nuanuaku ufa siaina 'u da koieku a da yemu.” 11 Tutuyanina vavine i nunago ufa 'ana koi faifaina, i vegole 'waidie i vo, A velu'ui-nuakalikali 'waimie, 'ana fata beledi 'wa da veleku a da 'ani?”

12 Vavine i tutula i vo, Mogitana 'Auvea yamu Yaubada i miamia, begaidi 'ana wagavayega 'a na vonemu, kebu tamu beledi i da 'eno'eno, falawa siaina ma ba'alina wata bani'odi bunama siaina ma ba'alina i 'eno'eno. We'e yau 'ai 'a 'a'ai'ewa 'a na nago vanuge, 'ani'aninina 'a na kabu-saweni, natuku taiadi 'a na 'ania i na 'a'avana, laseyega a na mwea.”

13-14 Nika Ilaitia i vonedi i vo, Kebu 'wa na kolologa, 'Auvea me Isileli yama Yaubada yana vona side bani'odi. Falawa ma ba'alina wata bunama ma ba'alina kebu i na 'a'ava wata i na lala 'ana tugusa 'Auvea 'wei i na veleda fwayafwaya i na 'ivebikai waifei i na tabo. 'Wa na nago yami vanuge, ava'ai 'wa voneyeniga 'wa na 'idewaimo, we'e nagami beledi siaina 'wa na kabuni 'wa na mieni a na 'ani. Mulieta luvegalalana 'wa na kabunidi 'omi wata natumi faifaimi.”

15 Ava'ai Ilaitia i voneyeniga 'wabula i 'idewai, tutuya fuedi 'ani'ani i veveluagai 'wabula wata yadi vanuga 'ana tomia faifaidi. 16 Bega ava'ai 'Auvea i vona'awaufaufa Ilaitia 'waineye 'ana mogitana i souyeni, falawa wata bunama ma ba'alidi kebu i da 'a'ava wata i da lalaga.

17 Tamu tutuya 'waineye vavine natudi i viga, 'ana viga i vebwaika-'afo'afo nika yawaina i 'a'ava. 18 Nika vavine Ilaitia i voneni i vo, 'Omu Yaubada yana tofolova, ava'ai sauluvaga 'u 'idewai 'waimeye? 'Omu 'u mai nuanuamu yama sakona 'u na sivemageseni wata natuku 'u na luvewafai.”

19 Nika Ilaitia i vo, Natumi 'wa na veleku.” Kwamananina i 'ewai i lakaveni taunina yana tutudaba nageneye, bei i ve'enovi 'ana 'ivie. 20 Nika Ilaitia i taidaida i vo, 'Auvea yaku Yaubada, ava'ai sauluvaga 'u 'idewai 'wabula 'waidie? I tauyeku bega yadi vanuge taiadi 'a na miamia, we'e 'omu natudi 'u luvewafai.” 21 2 Kin 4:34,35Nika Ilaitia kwamananina tabwaneye i lumata'afufu tutuya aitonu, bega i vegole 'Auvea 'waineye i vo, 'Auvea yaku Yaubada, a velu'ui-nuakalikali 'waimuye, kwamana de'e yawaina 'u da vevilai.”

22 'Auvea Ilaitia yana velu'ui i tutuli nika kwamana i yawasa-vaitugana. 23 Ilaitia kwamana i silakai i luagavuya bega i obuyeni vanuga dibuneye. Inana i veledi bega i vonedi i vo, 'Wa 'iseni, natumi 'akonadi i yawasa-vaitugana!”

24 Bega vavine i veifufu Ilaitia 'waineye i vo, 'Asiau 'a 'asetamu 'omu Yaubada yana tofolova, 'Auvea yana vona 'u lulu'ivoneyeniga, de'e vona mogitana.”