1 Tutuyanina Esekaia yawaina i 'a'ava, natuna Manasa 'ana 'ivi i 'ewai, tamana tutulina. Tutuyanina 'waineye Manasa 'ana malamala 12, Ielusalema nageneye i veveimea malamala 55 nagedie. Inana 'adi wagava Efasabai. 2 Iel 15:4Manasa kebu 'Auvea i da ve'ililibuyeniga, we'e 'aila'a tulina tulina yadi sauluva sakoidi wata 'eba bunumayaga i vetutuyamedi, kumanidiavo 'Auvea i luveyavulidiga yadi fwayafwaya 'wainega me Isileli matadie.

3 Manasa i sakona fai 'eba 'odu'odu bagase tamana Esekaia i luvela'ovidiga, i yogona-vaituganidi 'atamananidi 'waidie. 'Eba velomu i didigidi bei tomotoga i na 'odu'odu yaubada-vekavekali Beli 'waineye, wata 'ogola manamanawena 'eba bunumayaga i sivetovoia Asela 'ana 'odu'odu faifaina, bani'odi basenadi Kini Eabi i 'idewai. Wata Manasa i 'odu'odu 'ubwana, weta'i wata inala 'waidie.

4 2 Sam 7:13Basenadi 'Auvea i vo, Yaku Vanuga 'Eba Velu'ui Ielusalema nageneye 'aku wagava faifaina,” siwe Manasa 'eba velomu i didigidi yaubada vekavekali faifaidi Vanuganina nageneye. 5 'Eba velomunidi i didigidi tamu nageneye we'e tamu masi'edeye bega tomotoga i 'odu'odu 'ubwana, weta'i wata inala 'waidie. 6 Manasa natuotogina iavetana 'ai 'ala'alata 'waineye i velomuyeni wata i ve'wasa'wasala, i lulu'afo'a wata i bwalabwalata. We'e yana vetumagana toketokena i yatoi tove'ulua 'waidie, kumanidiavo towafa 'anu'anunudi taiadi i veveifufu wata tovebalau, kumanidiavo yaiaina taiadi i veveifufu tutuya i mimaiga faifaina i na vedi. De'e naninidi sakoiotogidi i 'idewadi nika 'waidiega 'Auvea i 'ivekamoogali.

10 Nika 'Auvea yana vala i vetunei yana vona 'ana tolu'ivonavo 'waidiega, kumanidiavo faifaina i folofolova. 11 Bega i vo, Me Amolaiti nani sakoidi i 'idewadi we'e me Iuda yadi Kini Manasa sauluva sakoiotogidi i 'idewadi, me Iuda i yogosakoyedi bega i 'odu'odu yaubada-vekavekali 'waidie. 12 Begaidi yau 'Auvea, me Isileli yami Yaubada, vita bwaikina a na mieni Ielusalema wata me Iuda 'waidie, tomotoga vala i na nogai vita de'e faifaina yawaidi i na lovoga wata i na kololo. 13 Basenadi me Samelia wata Kini Eabi yana 'aila'avo a luvela'ovidi, wata bani'odi a na 'idewadi tomotoga matatabudi Ielusalema nageneye i miamiani. Tomotoga 'aivoe yokeyokena i na lekoai nika i na lumata'afufuyeni i na lala, wata bani'odi yau Ielusalema a na luvela'ovi i na venage'ava. 14-15 Yaku tomotogavo yadi sauluva sakoidi 'waidega i 'i'ivenuasakoiku, tutuyanina 'waineye tubudiavo 'awalawa Itifita i 'iaweni i maiga 'ana tugusa 'asiau. Begaidi de'e tomotoganidi luvegalaladi a na 'anivelenedi 'adi gaviavo 'waidie, me Iuda yadi fwayafwaya, yadi kukua wata nani matatabuna i na lugogogonidi.

16 Wata Manasa tomotoga yadi sauluva tonovidi i luluvewafadi Ielusalema nageneye, fai 'adi 'aila'a bwaikina 'atamananina 'ana 'eda matatabuna dayaga i ulai. Wata me Iuda i 'edakumesedi bega i 'odu'odu kumaea 'waidie, i sakona 'Auvea mataneye.

18 Tutuyanina Manasa yawaina i 'a'ava yana tomotogavo i ve'ufai taunina yana vanuga 'ai'aiwabuna lilivaneye, bei welavi fuedi 'adi 'isa 'atumaidi i tovotovoi, 'awalawanina 'ana wagava Usa. I 'a'ava nika natuna iavetana Emoni i vekini, tamana tutulina.

19 Tutuyanina 'waineye Emoni 'ana malamala 22 i velamu i veveimea Ielusalema nageneye malamala 'ailuga nagedie. Inana 'adi wagava Medulemeti, Alusa natuna 'atamana Doteba 'wainega. 20 We'e Emoni 'Auvea kebu i da ve'ililibuyeniga, tamana bagase bani'odi yana sauluva sakoidi i vetutuyameni. 21 Kini Emoni tamana yana sauluva i 'ewa-'afo'afoi, i 'odu'odu kumaea 'eba bunumayaga 'waidie, bani'odi tamana basenadi i 'odu'odu 'waidie. 22 Tubunavo yadi 'Auvea Yaubada i baileni wata yana veimea kebu i da ve'ililibuyeniga.

23 Bega Kini Emoni yana tofolovavo yadi nuanua givagivana i 'idewai, nika bei i nikei i wafa taunina yana vanuge. 24 Tutuyanina me Iuda i 'asetai, Emoni 'ana to'etogiluva matatabudi i luvewafadi, we'e ma'itufa natuna iavetana Iosia i silakai i vekini tamana tutulina.