22
Iosia i vekini me Iuda 'waidie
1 Iel 3:6Tutuyanina Iosia 'ana malamala 8 'waineye i vekini Iuda yana 'eba veimea nageneye, i veveimea Ielusalema nageneye malamala 31 nagedie. Inana 'adi wagava Dedida, Adaya natuna 'atamana Bosati 'wainega. 2 Naninidi Iosia i 'idewadi tonovidi 'Auvea mataneye, yana sauluva matatabuna tubuna Devida yana 'eda'eda i vetutuyameni, kebu i da yogosako.
Iosia tomotoga 'ifwaidi i vonedi bega 'Auvea yana Vanuga 'Eba Velu'ui i na luve'ivauya. Tutuyanina i luluve'ivauya, Yaubada yana veimea i maiga Mosese 'wainega, i veluagai, i kilumidi 'aisaya bunudi 'waidie, bega i 'ewai i naweni Kini Iosia 'waineye.
11 Tamu tomogo bukinina i lu'iawawai nika tutuyanina kini vonanidi i nogai, ma yana nuavita bwaikina 'ana talauma i silabu'i. 12 'Aiatanina 'waineye kini yana tomotoga 'ifwaidi i goleva'augidi i maia 'waineye. Tomotoganidi bani'odi Ilika tovelomu, Safani natuna 'ana wagava Aikamu, Mikaia natuna 'ana wagava Akabo, Safani kini yana tokiluma we'e Asaia kini 'ana toawave'eda'eda. 13 Kini i vonedi i vo, 'Wa na nago Vanuga 'Eba Velu'ui nageneye bega 'wa na veifufu 'Auvea 'waineye faifaiku wata me Iuda matatabuna faifaidi. 'Wa na velutolieni vonanidi buki i veluagaiga nageneye faifaidi. Tubudavo vonanidi kilukilumanidi kebu i da vematayakeyakedi begaidi 'Auvea ma yana kamogala i nuasako 'waideye. 'Ida wata bani'odi kebu ta da veve'ililibuyedi.”
Iosia yana tofolovavo bwaikidi i nagoi tamu 'Auvea yana tolu'ivona 'waineye, mulieta tolu'ivonanina 'Auvea yana tutula i lu'ivoneyeni me Iuda yadi kini 'waineye.
16-17 I vonedi i vo, Side bani'odi 'Auvea yana vona i vo, Yaku tomotogavo i vedumwe'ai'aieku bega yadi 'eba velomu i 'idewadi yaubada-vekavekali 'waidie i 'odu'odu wata kumaea i dabidi, yadi sauluvanidi 'waidiega i 'ivenuasakoiku. Begaidi vita bwaikaotogina a na maieni 'atamana de'e 'waineye wata 'ana tomia matatabuna 'waidie, bani'odi basenadi i kilumi bukinina nageneye. Yaku nuasako bani'odi 'ai 'ala'alata, kebu tamu aitoi 'ana fata i na 'weuyaga. 18 We'e Iuda 'ana kini, kumanina i vetunemu 'u mai 'waikuye, side bani'odi 'u na voneni 'u na vo, Yau 'Auvea me Isileli yami Yaubada, yaku tutula side bani'odi bukinina 'ana veifufu faifaidi. 19 Tutuyanina 'u nogai yaku awavesako 'atamana de'e 'ana tomotoga taiadi faifaidi, ma yamu nuavita taunimu 'u siobuyemu yau 'Auvea matakuye, 'amu talauma 'u silabulabu'idi wata 'u 'we'wela matakuye. Basenadi a vona-vagata 'awalawa de'e i na 'ivekokovi 'ana tomotoga taiadi we'e mali tomotoga 'ana wagava i na 'inanai yadi 'eba sidibidibi, siwe yamu nuavilana valana a nogai, faifaina a sosoana. 20 Bega yau a na tauyemu ma yamu nuaniwalova 'u na wafa, yamu tomotogavo i na tavunimu. Vitanidi bwaikidi a na viwedi 'awalawa de'e 'waineye kebu 'u na 'isediga.”
'Auvea i vona'a'avana, yana vala i lu'ivoneyeni kini 'waineye.