2 Samuela
'Eba kiavemageta
Buki de'e i veveifufu Devida yana veto'edakumeta wata yana vekini faifaina. Daba 1 i nago 4 i lulu'ivona yana vetoveimea me Iuda bolimana weyaginega 'aisedi faifaidi, we'e daba 5 i nago 24 i lulu'ivona me Isileli yavalata weyaginega faifaidi, kumanidiavo Devida i kumesedi me Iuda taiadi.
De'e kilumanina 'wainega i lulu'ivona Devida yana vetalaga 'ana gaviavo Isileli yana 'eba veimea nageneye wata mali 'awalawa 'waidie. De'e 'wainega 'ana fata i na veda Devida yana vetumagana wata yana nuakalikali Yaubada faifaina, siwe 'ana fata i na veda yana be'u sakona 'waineye wata yana 'eba mwea. Nika 'ana fata ta na 'iseni Yaubada Devida i vematavulogi wata bani'odiga i munega Devida i nuavilai yana sauluva sakoina 'wainega nika Yaubada i nuatavuni. Devida yana vetoveimea Isileli 'waineye vita fuedi i veluagadi siwe Yaubada i 'i'ita'ita'ieni wata yana vona'awaufaufa Devida 'waineye tubunavo taiadi 'waidie, i 'eno-vagata.
2 Samuela 'ana 'idi
1) Daba 5:1-4 Devida i vekini me Isileli faifaidi.
2) Daba 7:1-5; 8-17 'Auvea yana veakutagona i 'idewai Devida 'waineye.
3) Daba 11:1-17, 26-27 Devida i saidamana Bedisiba taiadi.
4) Daba 12:1-25 'Auvea yana tolu'ivona Neitani Devida i tolimatani yana vesauluva-sako faifaina.
5
Devida i vekini me Isileli faifaidi
1 Tutuya 'ifwaidi i 'a'avana wauma matatabuna Isileli nageneye i maia Ebiloni, i veifufu Devida 'waineye i vo, 'Ima yamu 'aila'avo mogitana wata dayagimu. 2 Basenadi Saulo i vekini bega i veveimeyema, we'e 'omu mogitana me Isileli 'u kumekumesema gavia 'adi tutuye. 'Auvea 'akonadi i vona'awaufaufa 'waimuye i vo, 'Omu yaku tomotoga me Isileli 'u na 'i'isave'avinidi wata 'u na 'e'edakumesedi.”
3 Tutuyanina me Isileli to'edakumeta 'au'auveadi matatabudi i maia Ebiloni, bei 'Auvea mataneye Kini Devida yana veakutagona i 'idewai to'edakumetanidi taiadi. To'edakumetanidi bunama 'wainega Devida i iwagi, vekini 'ana tugusa me Isileli faifaidi.
4 1 Kin 2:11; 1 Ifu 3:4; 29:27Tutuyanina Devida 'ana malamala 30 i veluagai nika i vekini, we'e malamala 40 nagedie me Isileli i kumekumesedi.
'Ifwaidi tutuya i 'a'avana, Devida yana tolugaviavo taiadi i nagoi 'atamana Ielusalema i tala'avui me Iebusaiti i leodi. Gavianina mulineye Devida yana vanuga bwaikina wata 'ana 'isa 'atumaina i yogoni Ielusalema nageneye. I 'a'avana Devida 'ifwaidi tomotoga taiadi i nagoi Veakutagona 'ana Didiwaka i 'ewai Vadavada Tabutabuna 'wainega i mieni Ielusalema, bei i yatoi tamu vadavada nageneye.