7
'Auvea yana veakutagona i 'idewai Devida 'waineye
1 Kini Devida 'akonadi yana vanuga bwaikina wata 'ana 'isa 'atumaina 'waineye i miamia, we'e 'Auvea veawai i veleni 'ana gaviavo 'waidiega. 2 Tamu 'aiata Kini Devida i veifufu Neitani 'waineye, kumanina Yaubada yana vona 'ana tolu'ivona, i voneni i vo, 'U ve'wada a na vonemu. 'Akonadi yaku vanuga 'ana 'isa 'atumaina a yogoni welavi sida*Sida tamu welavi fa'alina wata manamanawena. Folovanina magaina 'atumaina maliwaka 'ana 'isa'isa bani'odi, 'waidiega vanuga 'adi 'isa 'atumaidi i yogoyogonidi. 'wainega, we'e Yaubada yana Veakutagona 'ana Didiwaka bola i 'eno'eno vadavada nageneye.”
3 Neitani i vo, 'Auvea 'omu i labilabinimu bega ava'ai 'u na nuani nuamuye faifaina i lubwaineni 'u na 'idewai.”
4 Siwe lovananina 'waineye 'Auvea Neitani i voneni i vo,
5 'U na nago yaku tofolova Devida 'u na voneni 'u na vo, Yau 'Auvea bonaku side. Kebu a da venua'ivinemu bega yaku vanuga 'u na yogoni nika bei a na luku a na miamia.’
8 Wata yaku tofolova Devida 'u na voneni 'u na vo, Yau 'Auvea tomia abama yadi Tovemata'ai'ai side bonaku. Basenadi sifi 'u 'i'isave'avinidi mosomoso 'ala'alawidi 'waidie, siwe yau a vagavaimu folovanina 'wainega a silakaimu 'u vetoveimea yaku tomotoga me Isileli 'waidie. 9 Tutuya matatabuna yau a labilabinimu wata a 'i'ita'ita'iemu 'amu gaviavo 'waidiega, matamuye matatabudi a leodi. We'e tutuya de'e 'wainega i na nagoga, 'amu wagava a na 'ivebwaiki tomotoga 'ifwaidi ma 'adi wagava bwaikidi bani'odi. 10-11 Yau 'Auvea yaku tomotoga me Isileli yadi 'eba mia a na venua'ivineni, bei a na vemianidi i na ve'itulamuyeni nika kebu tamu aitoi vita i na veleveledi yadi mianina 'waineye. Basenadi toveimeavo a venua'ivinedi me Isileli i 'e'edakumesedi, tutuyanina 'wainega i maiga 'asiau tomotoga sakoidi yaku tomotogavo i 'i'ivekokovidi we'e 'awaie kebu bani'odiga. 'Asiau bega i na nagoga 'amu gaviavo 'waidiega a na 'i'ita'ita'iemu bega mia 'atumaina wata niwaniwalovina 'u na veveluagai. Yau 'Auvea a matakiamu, yamu 'aila'a a na 'ivebwaiki 'wa da vo bani'odi yamu vanuga a da yogoni bega 'wainega kini fuedi i na sousouyedi nika i na vevetoveimea.
12 Same 89:3,4; 132:11; Ion 7:42; Fol 2:30Devida, tutuyanina yawaimu i na 'a'avaga i na ve'ufamu, mulieta tamu tomogo yamu 'aila'a 'wainega, kumanina natuotogimu, a na silakai i na vekini nika yana 'eba veimea a na 'ivebwaiki wata a na kiavetoketokei 13 Kumanina tomogonina yaku vanuga i na yogoni 'aku wagava faifaina, we'e yau yana 'eba veimea a na kiavefa'ali nika i na 'eno-vagata. 14 Same 89:26,27; 2 Kol 6:18; Ibu 1:5Tomogonina yau 'asa'aiana tamana we'e kumanina 'asa'aiana natuku. Tutuyanina i na sakona matakuye yau 'Auvea a na vematavulogi 'wa da vo bani'odi tomogo natuna i da kiavetonoveni. 15 Siwe kebu 'ana fata yaku nuakalikali a na 'ewayavuleni, bani'odi nuakalikalinina a 'ewai Saulo 'wainega, nika tutulina 'omu 'u vekini. 16 Same 89:36,37'Omu yamu 'aila'a wata yamu 'eba veimea i na 'e'eno-vagata matakuye, tubumwavo i na vevekini wata i na veveimea kebu i na 'a'avaga.”
17 'Auvea i veifufu i 'a'avana, Neitani i nago Devida 'waineye, nani matatabuna i sivemagesediga i lu'ivoneyedi.