1 1 Ifu 20:1Tutuya koyova 'akonadi i velilivana, tutuyanina 'waineye kini yadi sauluva, i nunagoi 'adi gaviavo taiadi i lulugavia. Devida i veimea yana tovemata'ai'ai Ioabi, yana tolugavia 'adi to'edakumetavo wata me Isileli tolugavia matatabudi, i na nagoi me Emumoni taiadi i na vetalaga. Yadi tolugaviavo matatabudi i leoyedi, i 'a'avana yadi 'atamana Labai i sififineni bega i na luvela'ovi. We'e Devida i miamia Ielusalema.

2-4 Tamu 'aiata 'waineye 'akonadi i lavilavia Devida i veveawai 'ana 'ivie nika i tovoi i laka yana vanuga tabwana bababana 'waineye, i yabayaba wata 'atamana Ielusalema i vevetonovi. Devida yana 'isanina 'waineye tamu vavine i 'isedi yadi 'eba toa 'waineye i toatoa, vavinenidi 'iwakawakadi. We'e tutuyanina 'waineye 'akonadi yadi weta'i i 'a'ava, taunidi i 'ivevunavunagidi vevine 'adi veimea bani'odi. Devida tamu tomogo i vetunei bega i na velutoli vavinenidi faifaidi. Tomogonina i vilai i mai Devida i voneni i vo, Vavinenidi 'adi wagava Bedisiba, Ulaia tomogo Aite yana vavine, we'e tamadi 'ana wagava Eliamu.” Devida tomotoga 'ifwaidi i vetunedi bega i vagavaidi i miedi yana vanuge nika bei taiadi i veluaga. I 'a'avana i viladi i nago yadi vanuge. 5 Kebu tutuya manamanawenaga Bedisiba i 'asetadi i miana, bega vala i vetunei Devida 'waineye i voneni i vo, Yau 'akonadi 'a miana.”

6 Devida yana vala i vetunei tovemata'ai'ai Ioabi 'waineye i vo, Ulaia tomogo Aite 'u na voneni i na mai 'waikuye.” Yana voneye Ioabi Ulaia i vetunei i nago Devida 'waineye. 7 Tutuyanina i le'wa, Devida Ulaia i velutolieni Ioabi faifaina wata tolugavia matatabudi yadi mia wata yadi vetalaga gavianina nagena faifaina. 8 Devida Ulaia i voneni i vo, 'U na nago yamu vanuge bega 'agemu 'u na lekoadi wata 'u na veawai.” Ulaia i tauya we'e Devida kukua 'atumaidi i vetunei Ulaia 'ana nuakalikali. 9 Siwe Ulaia kebu i da nago yana vanuge, we'e ma'itufa i nago kini yana vanuga 'ana tolumadu'aivo taiadi i ve'ala'enova vanuganina yana 'eba luku 'waineye, kebu i da nago yana vanuge.

10 Tutuyanina Devida i 'asetai Ulaia kebu i da nago yana vanuge, yana vala i vetunei bega i na mai. I velutolieni i vo, 'Omu 'ani'ieyega 'u mai, awale lovane kebu 'u da nago yamu vanuge?”

11 Ulaia Devida i voneni i vo, Me Isileli wata me Iuda i miamiani vadavada 'waidie, Veakutagona 'ana Didiwaka taiadi. Tovemata'ai'ai Ioabi wata yamu tolugaviavo taiadi i miamiani 'eba vetalaga 'ana 'awasaseye. 'Ai'edi yau a na nago yaku vanuge a na 'ani, a na yemu wata yaku vavine taiadi a na 'eno, kebu 'ana 'isa wata 'ana vebae 'atumainaga. Kebu tamu sai'afo bani'odi a na vesauluvediga.”

12 Begaidi Devida Ulaia i voneni i vo, 'Atumaina, 'asiau side bei 'u na veawai we'e 'awa'awai a na vetunemu wata 'u na vilamu gavia 'waineye.” Nika Ulaia Ielusalema bei i mia-vebogi wata i 'eno-vaitugana. 13 Lavilavinina 'ana 'ani 'waineye Devida Ulaia i tayegi taiadi i ve'ala'ani wata Devida Ulaia i toke i veyemuya nuana i lugaugauya. Siwe lovananina 'waineye Ulaia kebu i da nago yana vanuge, we'e mogitana i nago kini yana vanuga 'ana tolumadu'aivo taiadi i ve'ala'enovi taunina 'ana 'ivie, kebu i da nago yana vanuge.

14 I 'atai Devida tamu lubulubu i kilumi Ulaia i veleni Ioabi faifaina. 15 Lubulubunina nageneye Devida i veifufu Ioabi 'waineye i vo, Ulaia 'u na ve'edakumetai vetalaga toketokena 'waineye. Tutuyanina i na vevetalaga yamu tolugaviavo matatabudi 'u na veviladi, we'e Ulaia i na tovi'eyeni nika 'ami gaviavo i na luvewafai.”

16 We'e Ioabi ma yana tolugaviavo 'atamana bwaikina i sififineni nuanuadi i na luvela'ovi. Tutuyanina lubulubunina Ioabi i 'ewai i lu'iawawai i 'a'avana, i veimea Ulaia i nago 'adi gaviavo yadi 'eba vetoketoke 'ana 'awasasa 'waineye. 17 I vevetalaga 'adi gaviavo i souyedi 'atamana bwaikina 'wainega nika 'ifwaidi Isileli tolugaviavo Ulaia tomogo Aite taiadi, i luvewafadi.

26 Tutuyanina Ulaia yana vavine yana wafa valana i noganogaiga, i toke i vemogai yadi lamoga faifaina. 27 Bedisiba yadi vemogai wata yadi nuavita i 'a'avana, Devida vala i vetunei i vagavaidi i mai yana vanuge i nagidi. Tutuya 'ifwaidi i 'a'avana, Bedisiba i yemu kwamana iavetana i tubuga. Siwe 'Auvea kebu i da sosoana Devida yana sauluvanina faifaina.