1 Same 51'Auvea Neitani, kumanina yana vona 'ana tolu'ivona, i vetunei Devida 'waineye. Tutuyanina Neitani i le'wa i vo, Tamu 'atamana 'waineye tomotoga 'adi 'ailuga i miamia, iana tomogo 'ai'aiwabuna we'e iana tovewekowekoma. 2-3 Tomogo 'ai'aiwabuna yana 'aisayavo fuedi, bani'odi bulumakau wata sifi we'e iana tovewekowekoma yana 'aisaya 'aitamogana sifi natudi. Yana 'aisayanina i kimwaneiga i 'i'isave'avini bega natunavo taiadi i vebwaika. Yana 'isave'avinanina 'waineye i veve'ania 'ana 'aivoe 'wainega i 'ani'ani wata 'ana vedi 'wainega i yemuyemu, i avalamaigi nimaneye i 'eno'eno 'wa da vo tamu natuna vevinena bani'odiga.

4 Tamu 'aiata 'waineye tomogo 'ai'aiwabuna 'ana wakawaka i mai yana vanuge. Nika tomogonina i tovoi tomogo i vewekowekomaga yana sifi natudi i 'ewai i nikei i vetagovi 'ana wakawaka faifaina we'e kebu taunina yana 'aisayayega.”

5 Tutuyanina Devida veifufunina i noganogai i nuasako-'afo'afo tomogonina 'waineye bega Neitani i voneni i vo, 'Auvea miamia-vagaina 'ana wagavayega a vona mogitana tomogonina sauluvanina i 'idewaiga i lubwaineni i na wafa! 6 A na veimea sifi natudiavo 'adi 4 'wainega i na tutula tomogo i vewekowekomaga 'waineye fai iana kebu i da 'isanuakalikalieni ava'ai i 'idewaiga 'waineye.”

7 Neitani Devida i voneni i vo, 'Omu 'asa'aiana tomogonimu. 'Auvea me Isileli yada Yaubada i veifufu faifaimu i vo, Yau kumaniku a venua'ivinemu a silakaimu 'u vekini me Isileli faifaidi wata a 'i'ita'ita'iemu Saulo yana toketokena 'wainega. 8 Saulo yana 'eba veimea, yana vevinevo wata Isileli Iuda taiadi a velemu bega 'omu 'u na vetoveimea faifaidi. 'Ai'edi 'ifwaidi nani 'waidiega 'u da ve'ale'usaga, yau 'ana fata naninidi ma 'adi 'imoso'i a da velemu. 9 We'e awale yaku veimea kebu 'u da ve'ilibuyeniga? Wata awale sauluva sakoina 'u 'idewai? Yamu veimea 'wainega me Emumoni yadi kefatayega Ulaia i luvewafai we'e yana vavine 'omu 'u luobuyedi. 10 Fai yau kebu 'u da ve'ililibuyekuga bega Ulaia yana vavine 'u vagavaidi yamu vavine, 'asiau bega i nunagoga yamu 'aila'avo tutuya matatabuna kefatayega i na vevetalaga.”

11 2 Sam 16:22Wata Neitani Devida i voneni i vo, 'Auvea i veifufu faifaimu i vo, Yamu sauluvanina sakoina faifaina, taunimu yamu 'aila'avo wata yamu vanuga 'ana tomia a na kiavekamogalidi i na vevedumwe'ai'aiemu. 'Awaie yamu vevinevo a na tauyedi tamu tomogo tulina taiadi i na veluaga mageseye tomotoga fuedi matadie. 12 'Omu sauluvanina 'u 'idewai givagivayega we'e yau sauluvanina a na tutuli a na sivemageseni me Isileli matadie.”

13 Nika i 'a'avana Devida Neitani i voneni i vo, Yau 'Auvea mataneye a sakona.”

Neitani i vo, E'e, mogitana 'u sakona siwe 'Auvea 'akonadi i nuatavunimu, kebu 'u na wafaga. 14 Fai 'Auvea kebu 'u da ve'ililibuyeniga 'u vedumwe'ubu'ubuseni, ma'itufa natumu siaina yawaina i na a'ava.”

15 Neitani i veifufu i 'a'avana, i tauya i nago yana vanuge. We'e kwamananina Ulaia yana vavine Devida taiadi i venatuneniga, 'Auvea viga bwaikina i veleni. 16 Devida i velu'ui Yaubada 'waineye kwamana siaina faifaina, begaidi i ve'udigana, kebu tamu sai'afo 'ani'ani i da 'aniga we'e lovane i 'eno'eno fwayefwayeye. 17 Yana tofolovavo 'au'auveadi i maia i voneni i na tovoi 'ani'ani i na 'ani siwe kebu yadi vona i da nogai bega taiadi i da ve'ala'ani.

18 'Aiata 'ana ve-7 'waineye kwamana yawaina i 'a'ava, Devida yana tofolovavo i ve'alakolokolo, kebu nuanuadi i na voneni kwamana yana wafa faifaina. Fai i nuanua i vo, Tutuyanina kwamana ma yawaineye ta vonevoneni 'ani faifaina siwe bonada kebu i da noganogaiga. We'e 'ai'edi ta na voneni ta na vo, Kwamana siaina yawaina i a'ava,’ voke kini taunina i na 'ivekokovi.”

19 Devida yana tofolovavo i 'isedi i veve'awayaya nika i 'asetai kwamana 'akonadi yawaina i 'a'ava, begaidi Devida i velutoli yana tofolovavo 'waidie i vo, Kwamana yawaina i 'a'ava?” Nika matatabudi i vo, E'e, 'akonadi yawaina i a'ava.”

20 Bega Devida i tovoi fwayafwayayega nuavita 'ana talauma i ta'idi, i toa, i veinata i 'a'avana talauma 'atumaidi i silakavedi. Devida i nago 'Auvea yana Vanuga 'waineye i 'odu 'Auvea i subiai. I 'a'avana i vilai vanuge, yana tofolovavo i vonedi 'ana'ana i mieni i 'ani.

21 Devida yana tofolovavo i voneni i vo, Yamu sauluvanina 'a bavuyeni. Kwamana bola ma yawaineye 'u veve'udigana wata 'u vevemogai, we'e 'asiau kwamana yawaina i 'a'avana, nika 'u tovoi 'ani'ani 'u 'ani.”

22 I tutula i vo, Kwamana ma yawaineye a veve'udigana wata a vevemogai, nuakuye a vo, Voke 'Auvea i da 'isanuakalikalieku bega kwamana i da 'ive'atumaia bega ma yawaina i da miamia.’ 23 We'e 'akonadi yawaina i 'a'ava kebu i da lubwaineku bega a na ve'udigana. Nika 'wa da 'asetai, 'aku fata yawaina a na veleni i na yawasa-vaitugana? Kebu'a'avaotoga. Tamu 'aiata a na nago kwamananina 'waineye we'e taunina kebu 'ana fata i na vilai 'waikuye.”

24-25 Devida yana vavine nuadi i 'iveolooloi, i 'a'avana i nago 'waidie taiadi i veluaga nika i miana. Tutuya 'ifwaidi i 'a'avana, kwamana iavetana i tubuga, Devida i goleni Solomoni. 'Auvea kwamananina i nuakalikalieni, begaidi yana tolu'ivona Neitani i vetunei Devida 'waineye i voneni bega kwamananina i na goleni Iedidia, 'ana saivila 'Auvea i nuakalikalieni.