Emosi
'Eba kiavemageta
Emosi i miamia tamu 'atamana siaina 'waineye Bedeliema lilivaneye, Iuda yana 'eba veimea nageneye. Tutuyanina 'waineye Yaubada i goleni i na vetolu'ivona faifaina. Yaubada yana vona i na lu'ivoneyeni me Isileli 'waidie wata tomotoga 'adi 'aila'a tulina tulina i miamiani lilivadie. Emosi i mamatakiadi bega i na 'asetai yadi sauluva sakoidi faifaidi Yaubada i na vematavulogidi. Tomotoganidi Yaubada kebu i da ve'ililibuyeniga, i vevekali wata tovewekowekoma yadi kukua i lulueloelodi.
Wata Emosi Yaubada yana vona'awaufaufa i lulu'ivoneyeni i vo, 'Awaie Isileli yana 'eba veimea matatabuna i na luve'ivauya, Yaubada yana Vanuga 'Eba Velu'ui i na yogona-vaitugani wata Kini Devida tubunavo yadi fwayafwaya taunidi i na veveimeyeni nika tomotoga i na mia-'atumai.
8
'Auvea tolueloelo i awavesakoyedi
'Auvea i vona i vo,
4 'Wa ve'wada a na vonemi.
Tomotoga ma 'adi vita 'wa vavaogoogodi,
wata nuanuami tovewekowekoma 'wa na lueloelodi.
5 Nuanuami 'aiata veawai wata tafalolo 'ana sakali i na 'abiwalowaloga,
bega 'ami fata 'ani'ani 'wa na vevekimwane,
wata tomotoga i kimwakimwanega 'wa na lueloelodi.
'Ani'ani 'adi tutula 'wa 'i'imoso'iedi i vevebwaika-'afo'afo,
'ani'ani 'wa lu'iawawa sakoidi,
wata yami 'eba 'etowava 'ani'ani 'ana vita faifaina i vevekali, tokimwane 'wa lueloelodi.
6 'Ani'ani 'atumaidi wata 'anikudadi taiadi 'wa vevekimwaneyedi.
'Ai'edi tovewekowekoma 'ana 'ewa-maimaiga kebu i na tutuliga,
avinodi naninina siaina, bani'odi lubulubu 'aitamogana 'alo 'ageyafayafa 'aitamogana 'ana tutula,
siwe 'wa na vefoloveni yami tofolova-maimaiga.
7 'Auvea taunina 'ana wagavayega yana vona'awaufaufa toketokena i 'idewai,
wagavanina me Isileli*'Ana mogitana vona Ibeliu 'waineye, kumanina Iakobo tubunavo i veve'ililibuyeni. i veve'ililibuyeni 'wainega i vo,
Naninidi sakoidi 'wa 'idewadiga, kebu a na venuafanidi.
10 A na vematavulogimi vita bwaikina a na velemi bega yami sakali matatabuna i na 'a'ava, we'e ma'itufa 'wa na vevemogai,
yami lei matatabuna i na 'ailove, we'e ma'itufa 'wa na taivonavona.
'Wa na vemwakula wata kaleko sakoidi 'wa na ve'wesena,
wata nava'aumi 'wa na 'welia, yami nuavita bwaikina 'ana 'eba 'isa.
Vitanina a na velemiga faifaina 'wa na taivonavona 'wa da vo natumi yami tamogana yawaina i da 'a'ava.
Vemogainina 'ana tutuya i na nunagoga 'ana 'eba ve'a'ava 'ami vita i na vebwaika-'afo'afo.”