Iona
'Eba kiavemageta
Buki de'e i veveifufu Yaubada yana nuakalikali mali tomotoga faifaidi, kebu me Isileli 'aisedi faifaidi. Yaubada Iona i goleni i na vetolu'ivona faifaina. Nuanuana Iona vala i na naweni Ninive 'awalawa Asilia nageneye, i na lu'ivona tomotoga 'waidie bega yadi sauluva sakoidi i na vedumwe'ubu'ubusedi we'e Yaubada i na vematayakeyakeni. 'Ai'edi yadi sauluva sakoidi 'waidiega i na nuaviladi Yaubada kebu i na vematavulogidiga, we'e i na vesauluva 'atumaina 'waidie.
1
Iona i dega 'Auvea 'wainega
1 2 Kin 14:25'Auvea vala i vetunei Iona Amitai natuna 'waineye. 2 I voneni i vo, 'U na 'idewadewa 'u na nago Ninive, 'atamananina bwaikina 'waineye. Tomotoganidi 'u na vonedi, yadi sauluva sakoidi 'akonadi a 'asetadi begaidi a na vematavulogidi.
3 Siwe Iona i tovoi i 'abiwalowaloga i dega 'Auvea 'wainega. I nago Iofa, tamu waka i veluagai i tautauya Tasisi faifaina. Yana 'eda i tutuli i dodoga i na nago Tasisi.
4 Siwe 'Auvea kaukau toketokena i butuya malaveseye, yagina bwaikina i velamu igodi waka i da kuali. 5 Waka 'ana tofolovavo i kololo-'afo'afo, yadi yaubadavo 'waidie i vevegole 'aivaita faifaina. We'e kukua i tawetawedi malaveseye bega waka i na safaila.
We'e Iona i obu waka nageneye i 'eno-mwadumwadu. 6 Tomuli'auta i obu waka nageneye, Iona i 'iseni i luvagoni i vo, Awale 'u 'eno'eno? 'U tovoi 'u velu'ui yamu Yaubada 'waineye voke bonamu i na nogai, i na 'ita'ita'ieda nika kebu ta na wafaga.”
Waka 'ana tofolovavo Iona i taweni eyage
7 Waka 'ana tofolovavo ma ediavo i veifufu i vo, Tamu 'wava ta na 'waveni bega ta na lualeni aitoi mogitana vita de'e i mieni 'waideye.” Yadi 'wavanina 'wainega Iona 'ana wagava i vemageta nika vita i tovoieni.
8 I velutolieni i vo, 'U na vonema, aitoi vita de'e i na tovoieni? 'Omu ava'ai folovaga 'waineye 'u folofolova? Ava'aiega 'u mai? Ava'ai 'awalawaga 'wainega? Ava'ai 'aila'aga 'wainega 'u mai?”
9 Iona i tutula i vo, Yau tomogo Ibeliu, 'Auvea Yaubada abame 'waineye a 'odu'odu, kumanina fwayafwaya wata eyaga 'adi to'idewadewa.”
10 Tutuyanina waka 'ana tofolovavo i 'asetai Iona tamu 'Auvea yana tomotoga, i kololo-'afo'afo i voneni i vo, Awale naninina sakoiotogina 'u 'idewai?” Bani'odi i voneyediga fai Iona nagami i vonedi 'Auvea 'wainega i degadega.
11 Kaukau wata yagina i toke i vebwaika-'afo'afo, bega waka 'ana tofolovavo i velutolieni i vo, Ava'ai 'a na 'idewai 'waimuye bega yagina i na niwalova?”
12 Iona i tutula i vo, Vita de'e lamuna 'akonadi a 'asetai, yau yaku sakona 'wainega yagina bwaikina i nikenikeda, begaidi 'wa na silakaiku 'wa na taweku a na obu eyage, nika yagina i na niwalova.”
13 Waka 'ana tofolovavo kebu nuanuadi Iona i na taweni i na obu malaveseye, bega matatabudi i toke i voivoi nuanuadi waka i na vevilai i da luku 'avale, siwe i vetafewa-wayoga fai yagina bwaikaotogina. 14 Bega waka 'ana tofolovavo i toke i velu'ui 'Auvea 'waineye i vo, 'Auvea, kebu nuanuama 'a na wafa tomogo de'e yana sakona faifaina wata kebu 'u na vevitama tomogonina i na wafaga faifaina. Kaukau wata yagina bwaikidi 'u 'idewadiga, taunimu yamu nuanua 'ana laubwaina 'wainega.”
15 Tutuyanina waka 'ana tofolovavo i vona'a'ava, Iona i silakai i taweni i obu malaveseye. Kebu tutuya manamanawenaga, yagina i niwalova. 16 Tutuyanina waka 'ana tofolovavo i 'iseni, matatabudi 'Auvea i kololoyeni, bega i velomu 'waineye wata i vona'awaufaufa i na vematayakeyakeni.
17 Mad 12:40Siwe 'Auvea yana veimea 'wainega, igana bwaikaotogina i mai i bodaboda, tutuyanina Iona i taweni i obu malaveseye igana i tononi. Iona igana kamoneye i miamia 'aiata 'aitonu wata lovana 'aitonu.