2
Iona i velu'ui 'Auvea 'waineye
1 Tutuyanina Iona igana kamoneye i miamia, 'Auvea yana Yaubada 'waineye i velu'ui. 2 Side bani'odi i velu'uiedi i vo,
'Auvea, 'aku vita bwaikina 'wainega a velu'ui 'waimuye, bonaku 'u tutuli.
Towafa yadi 'eba mia dibuotoginega 'aivaita faifaina a taidaidaga, 'u nogayeku.
3 'U taweku a obu malaveta dibuotogineye,
yana 'eba ve'a'avaotoga 'waineye,
malolo toketokena nageneye.
Yamu yagina toketokeotogidi,
tomogokuye i tufuefuedi.
4 A vo, Yamu 'atumaina 'wainega 'u veugeugeku,
siwe a 'asetai yamu Vanuga 'Eba Velu'ui magemagetana a na 'isa-vaitugani.’
5 Kebu 'aku fata yawaiku a na vukei,
fai eyaga nageneye malaveta i tomweku,
dokidoki 'unu'unuku i fania.
6 A 'awakoluku a obu malaveta 'ana 'oya dibuotogidie,
bei fwayafwaya nageneye i yogoniku,
'awalawanina 'ana 'awa sisiboda-vagaidi.
Siwe 'omu 'Auvea yaku Yaubada, 'u 'ita'ita'ieku,
yawaiku 'u vevilai ovu dibuotoginega.
7 Sai'afoga a da ala,
nuaku i 'anita'ia 'Auvea a nuanimu,
nika a velu'ui 'waimuye.
Yamu Vanuga 'Eba Velu'ui tabutabuna 'wainega 'u nogayeku.
8 Tomotoganidi i 'odu'odu yaubada-vekavekali 'waidie,
yamu 'isanuakalikali i vedumwe'ubu'ubuseni.
9 We'e yau a na subiamu,
velomu a na 'idewai faifaimu,
naninidi a vona'awaufeufediga 'waimuye, a na 'idewadi.
Fai 'omu 'aiseotogimu 'aku To'ita'ita'i.”
10 'Aiata 'ifwaidi i 'a'avana, 'Auvea igana i veimeyeni, bega Iona i 'alayavuleni balebaleye.