3
'Auvea yana veimea Iona i vematayakeyakeni
1-2 'Auvea vala 'ana veluga i vetunei Iona 'waineye, i vo, 'U na 'idewadewa 'u na nago Ninive, 'atamana bwaikina 'waineye, valanina a velemuga 'u na lu'ivoneyeni tomotoga 'waidie.”
3 Iona 'Auvea yana vona i vematayakeyakeni, i nago Ninive. 'Atamananina bwaikaotogina, 'ana fata 'aiata 'aitonu ta na nunago mulieta ta na le'wa 'ana 'eba ve'a'ava 'waineye. 4 Mad 12:41; Luk 11:32'Aiatanina 'waineye Iona i luku 'atamana nageneye i vegolegole tomotoga 'waidie i vo, 'Aiata 40 i na 'a'avana Ninive i na luvela'ovi.”
5 Me Ninive valanina Yaubada 'wainega i nogai i vetumaganeni, bega tomotoga matatabudi, ma 'adi wagava i nagoga tomotoga-'avo'avovo 'waidie, ma ediavo i vo, Ta na ve'udigana 'ani wata nuavita 'ana vaigavu ta na silakavedi.”
6 Tutuyanina kini Iona yana lau'age i nogai, yana 'eba miabui 'ai'aiwabuna i baileni wata 'ana vaigavu i talalilia, we'e nuavita 'ana vaigavu i silakaveni, i miabui 'aufafeye, nuavilana 'ana tugusa. 7 Kini wata yana toveimeavo taiadi vala i vetunei me Ninive matatabuna 'waidie i vo,
Kebu tamu aitoi yana 'aisayavo taiadi i na 'ani wata i na yemu. 8 Tomotoga wata yami 'aisayavo taiadi matatabumi nuavita 'ana vaigavu 'wa na silakavedi, 'wa na toke 'wa na velu'ui Yaubada 'waineye. Yami sauluva sakoidi 'wa na vedumwe'ubu'ubusedi wata vetalaga 'wa na 'ailove. 9 Kebu ta da 'asetaiga, voke Yaubada yana nuanua i na sivilai yana nuasako i na 'ailove bega kebu ta na wafa.”
10 Yaubada i 'isedi 'akonadi yadi sauluva sakoidi i bailedi, begaidi yana nuanua i sivilai kebu i da vematavulogidi bani'odi basenadi i voneyedi.