1 Iona kebu i da sosoanaga fai Yaubada tomotoganidi kebu i da vematavulogidi, faifaina i nuasako. 2 Sou 34:6Begaidi i velu'ui i vo, 'Auvea, tutuyanina yaku 'atamane a miamiaga, a vonaga nani de'e i na souyeni, kumanina yaku lamunanina faifaina a 'abiwalowaloga a dega a nago Tasisi. A 'asetai 'omu Yaubada tonuakalikali wata to'isanuakalikali, kebu 'u da nunuasako-matayo'o. Yamu nuakalikali i 'eno-vagata wata yamu nuanua 'u sisivilai bega tomotoga kebu 'u da vevematavulogidi. 3 1 Kin 19:4Kumanina yaku lamunanina faifaina, kebu nuanuaku a na miamiaga. 'Auvea, 'aku laubwaina-'afo'afo a na wafa, begaidi yawaiku 'u na 'ewai.”

4 Siwe 'Auvea i tutula i vo, 'Omu kebu 'amu laubwaina 'u na nuasako nani de'e faifaina.”

5 Iona i souyeni 'atamananina 'wainega, i nago inala yana 'eba lakayega, yana lau'weta i tufeni i luku i ve'i'wa'u bega i lulukamata ava'ai wata i na souyeni me Ninive 'waidie. 6 'Auvea Yaubada welavi siaina i kiavetaboi i vebwaika 'wainega Iona i na ve'i'wa'u nika i na mia-'atumai. Welavinina faifaina Iona i sosoana-'afo'afo, fai 'wainega yana mia 'atumaina i veveluagai.

7 'Awa'awaie Yaubada nike i tauyeni, welavi siaina tolobwana i 'ania nika i 'awagi'ai. 8 Inala i luyauyauta, Yaubada kaukau yauyaugina i vetunei i nunuga inala yana 'eba lakayega Iona 'waineye. Inala i luyauyauta-'afo'afo 'unu'ununa i valavalai igodi i da ala. Iona i 'abiawa-'afo'afo i vo, I lubwaineku a da wafa, kebu nuanuaku ma yawaiku a na miamia.”

9 Yaubada i vo, Iona, awale 'u nuasako welavi i bwavuga faifaina?”

Iona i tutula i vo, E'e, a nuasakoga, nuanuaku a na wafa.”

10 'Auvea i vo, Welavi siaina faifaina 'u nuavitaga, 'omu kebu 'u da 'idewaiga 'alo 'u da kiavetaboiga. Welavinina i tabo-matayo'o wata i 'awagi'a-matayo'o. 11 We'e 'atamana bwaikina Ninive nageneye tomotoga 'adi 'aila'a 120,000 wata i vaganago, 'aisaya taiadi i miamia. Tomotoganidi sauluva sakoidi wata 'atumaidi kebu i da 'asetadiga,*'Ana mogitana vona Ibeliu 'waineye, tomotoganidi kebu i da 'asetai ava'aiega 'adi 'atagi wata 'adi wama. siwe matatabudi a 'i'isanuakalikaliedi.”