Maika
'Eba kiavemageta
Buki de'e i veveifufu Yaubada yana sauluva faifaidi. Yana sauluvanidi magemagetadi wata tonovidi. Nuanuana yana tomotoga wata i na vevesauluva bani'odi. Yaubada Maika i goleni i na vetolu'ivona faifaina, vala i veleni bega me Iuda wata me Isileli 'waidie i na lu'ivona yadi sauluva sakoidi faifaidi. Tomotoganidi toveumokai, tonualaka wata tovewekowekoma i vevekaliedi yadi kukua i lulueloelodi. I vonevonedi i lubwainedi yadi sauluva sakoidi i na vedumwe'ubu'ubusedi, we'e Yaubada i na vematayakeyakeni.
Maika wata i vona-samula 'awaie Keliso yana tubuga faifaina wata yana 'eba tubuga 'ana 'atamana.
5
Toveimea Bedeliema 'wainega
1 'Omi me Ielusalema, yami tovetalagavo 'wa na goleva'augidi,
gavia i 'eduyeda sai'afotoga i na tala'avuida.
Fulumaiega Isileli 'ana toveimea i na nikei 'ae'aeneye.
2 Mad 2:6; Ion 7:42'Auvea i vona i vo, Bedeliema Efaleti, 'awalawa Iuda nageneye 'omu 'atamana siaimu,
siwe 'waimuyega tamu tomogo i na souyeni me Isileli i na veimeyedi faifaiku.
Kumanina nagamidiotoga i miamia.”
3 'Awaie 'Auvea me Isileli i na 'anivelenedi 'adi gaviavo 'waidie,
i na nagoga 'ana tugusa vavine tamu i na venatuna,
kwamana iavetana i na venatuneni.
We'e enavo i miamiaga tulidie, i na viladi me Isileli taiadi i na luvetubama.
4 Yana folova i na velamu, yana tomotogavo i na 'i'isave'avinidi,
'Auvea yana toketokena 'wainega, yana tomotogavo i na 'i'isave'avinidi bani'odi yana sifi.
Fai 'Auvea yana Yaubada veimea i veleni i na 'idewai.
Yana tomotoga i na mia-'atumai 'adi gaviavo 'waidiega,
bega tomia fwayafwaya matatabuna yana 'atumaina i na 'iseni i na veve'ililibuyeni.