Veimea 'ana Luvaitugana
'Eba kiavemageta
Buki de'e me Guliki bonadiega i goleni Deuteronomy, wagavanina 'ana 'aseta Veimea 'ana Luvaitugana. Mosese Yaubada yana veimea i luvaituganidi, veimeanidi kebu 'ivaudiga wata kebu tulidiga.
Me Isileli sai'afotoga i na luku 'awalawa Kenani i na 'ewai bega i na veimeyeni, we'e Mosese kebu taiadi i na nagoga, begaidi i velu'ase'asedi mulieta i na nagoi. I tolinuata'iedi Yaubada bani'odi i vagavaidi Itifitayega i miedi sali'avu'avuye i 'isave'avinidi. Wata i vonedi tutuyanina i na luku Kenani 'waineye i na miamia, Yaubada i na veve'ililibuyeni.
4
Mosese me Isileli i vonedi bega i na vematayakayaka
1 Wata Mosese me Isileli i vonedi i vo, 'Omi me Isileli, 'wa ve'wada a na vonemi. Veimea wata awave'eda'eda 'asiau a vevemiga 'wa na nogaidi 'wa na vematayakeyakedi bega ma yawaimi 'wa na miamia, nika 'ami fata 'wa na luku 'awalawanina 'Auvea tubudavo yadi Yaubada i velevelemiga, 'wa na 'ewai 'wa na vetoniwakeni. 2 Ve 22:18,19Veimeanidi a lu'ivoneyedi kebu 'wa na 'imoso'i wata kebu 'wa na 'ewayavulagi 'waidiega. 'Auvea yami Yaubada yana veimea 'wa na nogaidi 'wa na vematayakeyakedimo.
6 Veimeanidi 'asa'aiana 'wa na vematayakeyakedi nika mali tomotoga yami nuamageta wata yami nuanua tonovidi i na 'isa'inanai. Tutuyanina veimeanidi i na nogaidi i na vo, Mogitana, me Isileli 'adi 'aila'a bwaikina, tomotoganidi yadi nuamageta wata yadi nuanua tonovidi.’
7 'Auvea yada Yaubada lilivadeye, tutuyanina ta na velu'ui 'waineye bonada i noganogai. Kebu tamu 'aila'a bwaikina 'alo siaina yana yaubadavo bani'odi. 8 'Asiau veimeanidi a lulu'ivoneyedi matatabuna tonovidi wata 'atumaidi, kebu tamu 'aila'a bwaikina 'alo siaina yana veimea wata ve'etoboda bani'odiga.
32-34 'Auvea yada Yaubada yana toketokena bwaikina 'wainega i vagavaimi Itifitayega 'wa souyemi, 'eba nuavogana wata 'eba nua'ewa bwaikidi i 'idewadi matamie. Me Itifita 'waidie i lugavia faifaimi bega veviga bwaikina i veledi. I vagavaimi, 'omi yana tomotogavo, wata 'Oya Sainai 'waineye 'wa nogai, taunina i veifufu 'ai 'ala'alata nagenega siwe bola ma yawaimi 'wa miamiani. Kebu tamu tutuya nani de'e bani'odi i da souyeni, kebu'a'ava. Nuami i na vilai i na nago 'idewavau 'waineye, tutuyanina Yaubada tomogo kumekumetana i 'idewai i maiga 'asiau 'wa na 'iseni, wata fwayafwaya matatabuna 'waineamo 'wa na lauala, kebu tamu nani de'e bani'odi 'wa na veluagaiga.
39 'Wa na nuave'avini wata 'wa na vetumaganeni tutuya matatabuna, kebu nuami i na fani, 'Auvea yami Yaubada abama nageneye i miamia wata fwayafwaya 'waineye. Kebu tamu yaubada i da miamia. 40 Yana veimea wata yana awave'eda'eda 'asiau a velevelemiga, matatabuna 'wa na ve'ililibuyedi bega 'omi wata tubumiavo yami mia i na ve'atumai wata yami tutuya i na vemanawe fwayafwayanina 'Auvea yami Yaubada i velevelemi 'asiau wata tutuya matatabuna faifaina.”