12
1 Kebu tubuvauvau yadi sauluva nuamu i na 'ewai
bega 'amu To'idewadewa 'u na venuafania.
Tubuvauvaumuye 'u na ve'ililibuyeni,
mulieta 'u na mialuku,
nika 'u na vo, Yaku mia kebu 'ana 'atumainaga.”
2 'Amu To'idewadewa 'u na nuanuani mulieta matamu i na sako,
bega inala, weta'i wata 'ubwana yadi mageta i na mwea
wata 'wei 'ana waowa i na 'eno-vagata.
3 'U na nuanuani mulieta 'agemu i na mwea*'Ana mogitana vona Ibeliu 'waineye, yamu vanuga 'ana to'isave'avinavo. i na tatava,
wata dumwemu i na 'obwa.
'U na nuanuani mulieta nigomu i na avuta,
matamu i na mwea kebu 'amu fata 'u na 'isadewa.†'Ana mogitana vona Ibeliu 'waineye, vevine i 'i'isaobu talabweka 'wainega.
4 'Amu To'idewadewa 'u na nuanuani mulieta folova 'atumaidi 'adi 'awasasa i na 'a'ava,‡'Ana mogitana vona Ibeliu 'waineye, 'eba souyagi 'ana 'awa i na sibodai.
wata kebu 'ana fata tofolova butu'aidi 'u na nogaidi.
Manuga yadi kwageyega i na luvagonimu
siwe kebu 'amu fata yadi kwage 'u na nogaya-dewadi.
5 'U na nuanuani mulieta be'u 'ana kololo 'waimuye i na souyeni,
nika 'u na vevenuafouviga ilagi faifaidi.
Wata mulieta nava'aumu i na budula 'wa da vo bani'odi ivuivu i da fuai,
taunimu 'u na luluyo'emu fai toketokena i na 'a'ava,
'wa da vo bani'odi limwana i da tatalafai'a,
we'e veluaga vavine taiadi 'ana nuanua 'akonadi i 'a'ava.
'Amu To'idewadewa 'u na nuanuani mulieta taumata lilivaneye 'u na le'wa,
kumanina yamu 'eba mia-vagata,
tovemogai i na vevemogai 'amu ve'ufa 'waineye.
6 E'e, i lubwainemi tubuvauvaumuye 'u na nuanuani mulieta yawai i na 'awatagoni,
'wa da vo bani'odi fwasalu 'ana bulava i da 'anidabai
wata 'aivoe i da 'anifuai.
Kebu 'u na lulukamata 'ana tugusa ufa 'eba koi 'ana ba'ala i na 'anikuali ufa luluvuala 'waineye,
wata ufa alaalana 'ana 'eba koi 'ana bulava i na 'anidabai.
7 Tomogoda i na ve'aufofo'uala i na vilai fwayefwayeye,
wata 'anunu i na vilai Yaubada 'waineye, kumanina 'ana to'anivelena.
8 Toawave'eda'eda i vo, Nani matatabuna nani-'avo'avovo wata nage'avadi.”
Veifufu 'ana 'eba ve'a'ava
9 Naninidi 'u na nuanuanidi. Toawave'eda'eda kumanina tonuamageta, yana 'aseta matatabuna i ve tomotoga 'waidie. Vona-awatabai matatabuna i vinenega-dewedi, 'adi nuanua i venua'ivinedi wata i 'idi-'atumaidi. 10 Toawave'eda'eda nuanuana vona 'atumaidi 'waidiega i na vona-'aivaita, we'e vonanidi i kilumidiga 'atumai'avadi.
11 Tonuamageta yadi veifufu tomotoga i awave'ede'ededi, 'wa da vo bani'odi tonibawe yana 'aisaya i da tayatayami. Veifufunidi 'adi luvetubama 'adi fata i na luuneuneda 'wa da vo bani'odi sifi 'adi to'isave'avina welaviega i da lulusogiedi. 12 Natuku, nuanuaku nani 'ifwaidi faifaidi a na velu'ase'asemu. Taunimu 'u na 'i'isave'avinimu, buki 'adi kiluma faifaidi kebu 'ana 'eba ve'a'avaga wata sikulu vaivaitugana 'wainega 'ako 'u na 'abiawa.
13 Nani matatabuna a sivemagesedi, 'adi nuanua side bani'odi.
I lubwaineni tomotoga matatabuda ma yada ve'ililibu Yaubada ta na kololoyeni wata yana veimea ta na vevematayakeyakedi. De'e veimeanina kumekumetana wata bwaikaotogina, tomotoga matatabuda yada 'eba folova.
14 Yada sauluva givagivadi, 'atumaidi wata sakoidi matatabuna faifaidi ta na vonayavuga Yaubada mataneye.