Aisea
'Eba kiavemageta
De'e bukinina i souyeni tamu Yaubada yana vona 'ana tolu'ivona bwaikina 'wainega, 'ana wagava Aisea. I miamia 'atamana Ielusalema, mulieta malamala 750 i 'a'avana Iesu i tubuga. Bukinina 'ana 'idi 'aitonu.
1. Daba 1-39 i veveifufuga, tutuyanina Asilia 'ana kini wata yana tolugaviavo i vevetalaga Isileli wata Iuda 'adi wauma tulina tulina taiadi i vevetoketoke-'iawedi. Yaubada yana tolu'ivonanina, me Iuda i vonevonedi kebu kini wata tolugaviavo yadi toketokena i na vetumaganedi we'e mogitana Yaubada 'aiseotogina i na vetumaganeni wata yana vona i na vematayakeyakedi.
2. Daba 40-55 'waineye i veveifufu, Babiloni 'ana kini wata yana tolugaviavo me Iuda i vetoketoke-'iawedi, fuedi i yogonidi i nawedi Babiloni. Aisea me Iuda i veve'isabodebodedi wata i vonevonedi bani'odi Yaubada i na munega i na viledi yadi 'atamana Ielusalema 'waineye bega yadi mia 'ivauna i na veledi.
3. Daba 56-66 i veveifufuga, me Iuda yadi vila-vaitugana Ielusalema 'waineye faifaina. Wata i veveifufu Yaubada yana nuanua 'atamana Ielusalema faifaina wata tomia fwayafwaya 'adi 'aila'a tulina tulina faifaidi.
2
'Auvea yana vona-samula tutuya i mimai faifaina
1 Naninidi 'Auvea i ve Aisea Emosa natuna 'waineye, Iuda wata Ielusalema faifaidi.
2 Tutuya 'ana 'eba ve'a'ava 'waineye,
'oyanina bei 'Auvea yana Vanuga 'eba Velu'ui i tovotovoiga i na kialakai.
'Oyanina manamanaweotogina wata 'ana wagava i na vebwaikaotoga kebu 'ifwaidi bani'odiga.
Tomia fwayafwaya matatabuna 'adi 'aila'a tulina tulina i na si'augidi.
3 'Auvea yana ve yana tomotoga faifaidi i na souyeni Saioni*Saioni, Ielusalema tamu 'ana wagava, we'e mogitana 'awasasanina Yaubada yana Vanuga 'Eba Velu'ui bei i tovotovoi. 'wainega,
wata yana vona Ielusalema 'wainega.
Tomotoga fuedi i na nagoi i na vo,
'Wa maia ta na laka 'Auvea yana 'oya 'waineye,
Iakobo†Iakobo tamu 'ana 'eba 'ainana Isileli. yana Yaubada, yana Vanuge.
Bei i na ve 'waideye
bega ava'ai nuanuana ta na 'i'idewadi.”
4 Ioe 3:10; Mai 4:3'Ai'edi tomotoga 'aila'a tulina tulina i na vevetalaga,
'Auvea i na velomu-vedamana,
yadi ve'ikwayekwayega i na 'ailove.
Yadi 'eba vetalaga kefata kainumu i na kabunidi wata i na tutudi
nika i na ve-daima.
We'e yadi 'ibadi 'eba vetalaga,
'awaie i na vefolovedi 'adi 'aisaya 'eba yaubani.
Tomia fwayafwaya 'adi 'aila'a tulina tulina kebu wata i na vevetalaga,
'alo i na vewavawava vetalaga faifaina.
5 'Omi Iakobo tubunavo 'wa maia,
'Auvea yana mageta 'waineye ta na miamia,
magetanina 'wainega i na 'e'edakumeseda.